ԵՐԵՎԱՆ, 4 հունիսի. /Նովոստի-Արմենիա/. Ճգնաժամի պատճառով ՀՀ ԱԳՆ-ն դադարեցրել է Հելսինկիում, Լիտվայում և Ճապոնիայում դեսպանատների բացման գործընթացը, ասաց ՀՀ փոխարտգործնախարար Արման Կիրակոսյանը։
«Տվյալ դեսպանատների բացման գործընթացը դադարեցվել է, բայց մենք հուսով ենք, որ տարեվերջին կկարողանանք բացել դրանք»,- ասաց նա՝ ԱԺ-ում ներկայացնելով ԱԳՆ գծով 2008 թ.-ի բյուջեի կատարման հաշվետվությունը։
Փոխնախարարը հայտնեց, որ 2008 թ.-ին բացվել է երկու դիվանագիտական ներկայացուցչություն՝ Բաթումիում և Հաագայում։
Կիրակոսյանը նշեց, որ Հայաստանը 47 դիվանագիտական ներկայացուցչություն ունի տարբեր երկրներում, ընդ որում պետության սեփականությունն են շենքերից 14-ը։
«Համաձայն եմ, որ մենք պետք է ընդլայնենք սեփական շենքերի ցուցակը։ Այժմ մենք անվերադարձ օգտագործման հանձնված 12 տուն ունենք, դա տարբեր համայնքների օգնությունն է, և մենք աշխատանքներ ենք տանում դրանք որպես նվիրատվություն ձևակերպելու համար, ինչից հետո դրանք կդառնան պետության սեփականությունը»,- ասաց նա։
Կիրակոսյանը հավելեց նաև, որ վարձակալության պայմաններով ՀՀ ԱԳՆ-ն 15 շենք օգտագործում է որպես դիվանագիտական ներկայացուցչություն տարբեր երկրներում։
Նա հայտնեց նաև, որ Հայաստանը ընդամենը երկու արևտրային ներկայացուցչություն ունի Բրյուսելում և Շվեյցարիայում, ընդ որում այդ կազմակերպությունները ավելի շատ ներկայացուցչական գործառույթներ ունեն միջազգային կազմակերպություններում։
«Մեր դիրքորոշումն այնպիսին է, որ դեսպանատներն իրենք պետք է զբաղվեն երկկողմ տնտեսական կապերի զարգացմամբ»,- ասաց Կիրակոսյանը։ -0-
