Հունիսի 3-ի տվյալների համաձայն, Սևանա լճի մակարդակը կազմել է 1899,25 մետր, ինչը 4 սանտիմետրով բարձր է անցյալ տարվա նույն ժամանակամիջոցի ցուցանիշից, տեղեկացնում է ՀՀ բնապահպանության նախարարության կայքում տեղակայված հաղորդագրությունը։
Ըստ տեղեկատվության, 2009 թ.-ին Արփա-Սևան ջրատարով Սևանա լիճ է մուտք գործել շուրջ 84 մլն խորանարդ մետր ջուր։
Միաժամանակ լճից ոռոգման նպատակներով դեռևս ջուր չի վերցվել։
«Ախուրյանի և Ազատի ջրամբարները լցված են գրեթե 100 տոկոսով, Ապարանի ջրամբարը` 53, Կեչուտի ջրամբարը` 92 տոկոսով», - ասվում է տեղեկատվության մեջ։
Սևանա լիճը խոշորագույն բարձր լեռնային լիճ է Կովկասում։ Այն գտնվում է 1900 մ բարձրության վրա, ունի 1240 քառակուսի կմ մակերես, խորությունը հասնում է մինչև 83 մետրի։ Սևանա լիճ է հոսում 28 գետ, նրանից է սկիզբ առնում Հրազդան գետը (Արաքսի վտակը)։
Սևանա լիճը խմելու ջրի միակ խոշոր երաշխավորված աղբյուրն է Հայաստանում և խոշորագույնը ողջ Կովկասում, ինչի պատճառով վաղուց հարց էր դրվել լճի ջրային պաշարների արդյունավետ օգտագործման մասին։-0-
