ԵՐԵՎԱՆ, 4 հունիսի. /Նովոստի-Արմենիա/. Հայկական կողմը կառուցողական է տրամադրված Հայաստանի և Ադրբեջանի նախագահների հանդիպմանը, որը տեղի կունենա Սանկտ Պետերբուրգում միջազգային տնտեսական համաժողովի շրջանակներում, ասաց ՀՀ ԱԳ նախարարի տեղակալ Շավարշ Քոչարյանը:
«Մենք բավականին կառուցողական ենք տրամադրված, սակայն միաժամանակ այդ հանդիպման ելքն, իհարկե, կախված է նաև ադրբեջանական կողմի կառուցողականությունից»,- չորեքշաբթի «Նովոստի-Արմենիա» գործակալությունը տված հարցազրույցի ժամանակ ասաց Քոչարյանը:
Նրա խոսքով, հայկական կողմը միշտ է կառուցողական եղել: «Մենք ամեն հանդիպումից արդյունքներ ենք ակնկալում և միշտ ելնում ենք դրանից: Համենայն դեպս, ստորագրվեց Մայնդորֆյան հռչակագիրը: Դա քայլ առաջ էր, որպեսզի գործընթացն ընթանա խաղաղ ճանապարհով»,- ասաց ԱԳՆ ղեկավարը:
2008թ. նոյեմբերի 2-ին Մայնդորֆում կայացած եռակողմ հանդիպման ժամանակ Հայաստանի, Ռուսաստանի և Ադրբեջանի նախագահները ստորագրեցին մի հռչակագիր: Երեք երկրների ղեկավարները պայմանավորվեցին համատեղ աշխատել Կովկասում իրավիճակն առողջացնելու ուղղությամբ, ինչպես նաև հանձնարարեցին արտգործնախարարներին շարունակել աշխատանքները ղարաբաղյան հակամարտությունը կարգավորելու ուղղությամբ:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
