Հայկական գրական-գեղարվեստական «Նարգիզ» ամսագիրը տոնում է իր քառամյա տարեդարձը

ԵՐԵՎԱՆ, 3 հունիսի. /Նովոստի-Արմենիա/. Հայկական գրական-գեղարվեստական «Նարգիզ» ամսագիրը տոնեց իր քառամյա տարեդարձը։

«4 տարում «Նարգիզն» իր շուրջ հավաքեց լավագույն ինչպես սկսնակ, այնպես էլ հեղինակավոր գրողներին։ Մենք ձգտում էինք ազատ մշակութային հրատարակություն ստեղծել»,- ասաց ամսագրի հրատարակող, բանաստեղծուհի Սոնա Վանը։

4 տարում լույս է տեսել ամսագրի 20 համար, որոնք ջերմ ընդունելության են արժանացել ինչպես Հայաստանում, այնպես էլ սփյուռքում։

Հրատարակության քառամյակի կապակցությամբ, Վանը մրցանակներ է շնորհել իր աշխատակիցներին։

Պատվոգրեր են շնորհվել լավագույն բանաստեղծություն, լավագույն արձակ, գիտական-գեղարվեստական հոդված, ինքնատիպ գեղարվեստական էսսե և թարգմանություն անվանակարգերի համար։ 

Հատուկ պատվոգրի է արժանացել Անդրեյ Բիտովի «Ապրելու մտադրություն» գրքի թարգմանությունը։

Մրցանակաբաշխության ժամանակ մի շարք գրականագետներ գնահատեցին հենց իր՝ Սոնա Վանի արվեստը՝ ընդգծելով նրա անհատականությունը։

ԱՄՆ-ում բնակվող բանաստեղծուհի Սոնա Վանը սեփական միջոցներով է ստեղծել երկու ամիսը մեկ անգամ լույս տեսնող «Նարգիզ» գրական-գեղարվեստական ամսագիրը, որի առաջին համարը թողարկվել է 2005 թ.-ին։ --0--