Երևանի ավագանու խորհրդի ընտրություններին առանձնահատուկ խախտումներ չեն եղել. ՀՀԿ խմբակցության ղեկավար

Մայիսի 31-ին կայացած Երևանի ավագանու խորհրդի ընտրությունները մեր երկրում նախընտրական քարոզարշավի նոր մոտեցում ու մշակույթ են ձևավորել և անցել են առանց առանձնահատուկ խախտումների, կարծում է Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը։

«Ընտրությունների ընթացքում տեղ գտած առանձին աննշան խախտումները ոչ մի կերպ չեն կարող ազդել ընտրությունների դրական արդյունքի վրա»,- չորեքշաբթի լրագրողներին հայտնեց Սահակյանը։

Միաժամանակ նա չի կարծում, թե գործող ընտրական օրենսդրությունը լրացումների և փոփոխությունների կարիք ունի։

Սահակյանի կարծիքով, նախընտրական արշավի մասնակիցները չեն կիրառել «սև PR-ի» տեխնոլոգիաներ, մասնակիցներից յուրաքանչյուրը փորձել է նվաճել հասարակության վստահությունը։

Նա նշեց, որ միակ անհաղթահարելի խոչընդոտը քաղաքակիրթ ընտրական գործընթացի հաստատման ճանապարհին դեռևս մնում են արդեն ավանդույթ դարձած հետընտրական երևույթները։

«Մենք առայժմ չենք հասել այն մակարդակի, որ հաղթած կուսակցությունները շնորհավորանքներ ստանան ընտրությունների մյուս մասնակիցներից»,- նշեց նա։

Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։

Կենտրոնական ընտրական հանձնաժողովի տվյալների համաձայն՝ Երևանի Ավագանու խորհուրդ են անցել անհրաժեշտ շեմը հաղթահարած երկու կուսակցություն և մեկ քաղաքական դաշինք։

Կենտրոնական ընտրական հանձնաժողովի տվյալներով, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը։

Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։

Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։

Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-