ԵՐԵՎԱՆ, 3 հունիսի. /Նովոստի-Արմենիա/. Ավագանու խորհրդի ընտրությունների արդյունքում Երևանի քաղաքապետարանն արժեզրկվել է որպես լեգիտիմ կառույց, կարծում է Երևանի նախկին քաղաքապետ, ընդդիմադիր Հայ ազգային կոնգրեսի ներկայացուցիչ Վահագն Խաչատրյանը։
«Եթե առայսօր քաղաքապետարանը որպես լեգիտիմ կառույց որևէ կասկած չէր հարուցում, քանի որ քաղաքապետը նշանակվում էր երկրի նախագահի կողմից, ապա ընտրություններից հետո հաստատվեց, որ իշխանությունը որևէ կերպ չի կարող փոխվել»,- ասաց Խաչատրյանը Մամուլի երկուշաբթի ազգային ակումբում տեղի ունեցած մամուլի ասուլիսում։
Այդ կապակցությամբ, Խաչատրյանի խոսքերով, ՀԱԿ խնդիրը գործող իշխանությունը փոխելու ուղղությամբ մնում է ուժի մեջ։
«Այն ամենն, ինչ տեղի էր ունենում մայիսի 31-ին, չի կարելի ընտրություններ անվանել։ Զանգվածային խախտումների միջոցով իրականացվեց մի ծրագիր «ընտրություններ» անվանումով»,- ընդգծեց նա։
«Ընտրությունների ընթացքում տեղի ունեցածը կարելի է անվանել ահաբեկչություն ընտրողների և դիտորդների նկատմամբ, և նպատակ ուներ հասնել առավելագույն ձայների, անել այնպես, որպեսզի ՀՀԿ-ն ստանար ընտրողների ձայների 40 տոկոսը և ավելին»,- ասաց Խաչատրյանը։
Խաչատրյանի խոսքերով՝ ընտրությունների կեղծարարության մասին կարող է վկայել ձայների անհավասար տեխաբաշխումը մի շարք ընտրատեղամասերում։
Նա նշեց, որ, օրինակ, 8/22 տեղամասում 2025 ընտրողներից ընտրության են մասնակցել 1880-ը, ինչը կազմում է մոտ 90 տոկոս, որոնցից 1011-ը ձայնը տրվել է ՀՀԿ-ին և ընդամենը 59 ձայն՝ ՀԱԿ-ին, իսկ 8/23 ընտրատեղամասում 1900 ընտրողներից մասնակցել է 1718-ը, որոնցից ՀԱԿ-ի օգտին քվերակել ՝ 81 ընտրող։
Ինչ վերաբերում է ՀԱԿ կողմից առկա խախտումների լրացուցիչ քննություն անցկացնելու հնարավորությանը՝ ապա Խաչատրյանը նշեց, որ դրա անհրաժեշտությունը չկա, քանի որ կեղծումն ակնհայտ է եղել։
«Ավելին, մեր վստահված անձինք և դիտորդները տեսել են կեղծարարություններում ներգրավված ոստիկանների՝ քաղաքացիական հագուստով»,- նշեց Երևանի նախկին քաղաքապետը։
Նրա խոսքերով՝ այդ ամենը հանգեցրեց ՀԱԿ-ի հրաժարվելուն Ավագանու խորհրդի մանդատներից և քաղաքապետարանի աշխատանքներին մասնակցելուց։
Խաչատրյանը նշեց նաև, որ ներկայումս իշխանությունների և ընդդիմության միջև երկխոսության հնարավորությունը բացակայում է։
Կենտրոնական ընտրական հանձնաժողովի տվյալներով, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։ -0-
