Լեռնային Ղարաբաղի կարգավիճակի հարցը բանակցային գործընթացի ամենաէական հարցերից մեկն է, «Նովոստի-Արմենիա» գործակալությանը տված հարցազրույցում ասաց Երևանի պետական համալսարանի պրոռեկտորի տեղակալ, քաղաքագետ Ալեքսանդր Մարկարովը՝ մեկնաբանելով Սանկտ Պետերբուրգում կայանալիք Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը։
«Այսօրվա դրությամբ բոլոր կետերը մեր կողմից հստակեցված են։ Այսինքն առաջարկությունները, որոնց շուրջ ակնկալվում Է որևէ քննարկում, հայկական կողմն արդեն ներկայացրել է մյուս կողմին և համանախագահներին, և հայկական կողմից որևէ զիջման ակնկալիքի մասին խոսելը բավականին բարդ է։ Կարգավիճակի հարցը նախկինի պես մնում է բանակցային գործընթացի ամենաէական հարցերից մեկը», - ասաց Մարկարովը։
Միաժամանակ փորձագետը նշեց, որ բավականին բարդ է խոսել տնտեսական համաժողովի շրջանակներում Սանկտ Պետերբուրգում կայանալիք հանդիպման արդյունքում առաջընթացի մասին։
«Սակայն անհրաժեշտ է ուշադրություն դարձնել այն փաստի վրա, որ բանակցային գործընթացը շարունակվում է, և երկու կողմերն էլ շատ լավ հասկանում են, որ, ըստ էության, բանակցային գործընթացն այլընտրանք չունի», - նշեց փորձագետը։
Մարկարովը նաև կարծում է, որ Սանկտ Պետերբուրգում կայանալիք հանդիպման ընթացքում նոր հայտարարությունների և առաջարկությունների մասին խոսելը բավականին բարդ է։
«Ընդհանուր առմամբ նոր առաջարկությունների մասին խոսելը բավականին բարդ է, քանի որ բանակցային գործընթացը ընթանում է արդեն ամրագրված դրույթների շուրջ», - նշեց Մարկարովը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
