ՀՀ Ֆուտբոլի ֆեդերացիայի ղեկավարը կոչ արեց երկրպագուներին սատարել երիտասարդական հավաքականին Թուրքիայի հետ հանդիպման ժամանակ

ԵՐԵՎԱՆ, 2 հունիսի. /Նովոստի-Արմենիա/. ՀՀ Ֆուտբոլի ֆեդերացիայի նախագահ Ռուբեն Հայրապետյանը կոչ արեց երկրպագուներին 2011 թ.-ի Եվրոպայի առաջնության ընտրական փուլի շրջանակներում Թուրքիայի թիմի հետ հունիսի 9-ին Երևանի հանրապետական մարզադաշտում կայանալիք հանդիպման ժամանակ սատարել Հայաստանի երիտասարդական հավաքականին: 

«Ես շատ եմ կարևորում երկրպագուների բուռն սատարումը, որոնք կարող են առաջիկա հանդիպման ժամանակ «12-րդ խաղացողի» դերը վերցնել իրենց վրա: Վստահ եմ, որ ձեր օգնությամբ ու տղաների մեծ նվիրումի շնորհիվ, մենք կկարողանանք հաջողության հասնել»,- ասվում է ՀՖՖ նախագահի «Նովոստի-Արմենիա» գործակալությանը ֆեդերացիայի մամուլի քարտուղար Գեորգի Մաթևոսյանի կողմից տրամադրված ուղերձում:

Ֆուտբոլի ֆեդերացիայի նախագահն ընդգծեց, որ ճակատագրի հեգնանքով վերջին տարում հայ ֆուտբոլիստներն արդեն 5-րդ անգամ են հանդիպում թուրքերի հետ տարբեր տարիքային խմբերում:

«Մեր երիտասարդական հավաքականն անցյալ տարի ապացուցեց, որ ի զորու է հավասար պայքար մղել ուժեղ մրցակցի հետ և նույնիսկ հաղթանակ տանել նրա նկատմամբ»,- նշեց Հայրապետյանը:

2008 թ.-ի օգոստոսին ՀՀ ֆուտբոլի երիտասարադական հավաքականը 2-1 հաշվով կամային հաղթանակ տարավ Թուրքիայի թիմի նկատմամբ 2009 թ.-ի Եվրոպայի երիտասարդական առաջնության ընտրական փուլի շրջանակներում:

Ֆեդերացիայի նախագահի խոսքերով՝ Հայաստանի Մ 21 տարեկանների հավաքականում այժմ սերնդափոխություն է, այդուհանդերձ, հայկական թիմի անդամները բավականին փորձառու են:

«Վստահ եմ, որ մենք կարող ենք հաջող հանդես գալ այս ընտրական փուլում»,- ասաց Հայրապետյանը:

Հայաստանի հավաքականը Թուրքիայի, Շվեյցարիայի, Իռլանդիայի, Վրաստանի և Էստոնիայի թիմերի հետ գտնվու է միևնույն խմբում։

Եվրոպական բոլոր հավաքականները բաժանված են 10 նախընտրական խմբերի։ Սեփական խմբերի հաղթողները և երկրորդ տեղը զբաղեցրած 4 լավագույն թիմերը կխաղարկեն Եվրոպայի առաջնության 7 ուղեգրերը, որը կանցկացվի 2011 թ.-ի հունիսին Դանիայում։ -0-