«168 ժամ» թերթի լրագրող Արմինե Ավետյանն ու «Թրանսփերենսի Ինտերնեշնլ» հասարակական կազմակերպության ներկայացուցիչ Սոնա Այվազյանը, ովքեր մի շարք ԶԼՄ-ների հրապարակումների համաձայն՝ ծեծի էին ենթարկվել Երևանի Ավագանու խորհրդի ընտրությունների օրը, հրաժարվել են ներկայանալ Հատուկ քննչական ծառայություն ցուցմունքներ տալու համար։
Այս մասին «Նովոստի-Արմենիա» գործակալությանը տեղեկացրեցին Հատուկ քննչական ծառայությունից։
ՀՀ գլխավոր դատախազ Աղվան Հովսեփյանի կարգադրությամբ՝ հարուցվել է քրեական գործ՝ քվեարկության ընթացքում խախտումների վերաբերյալ մի շարք ԶԼՄ-ների հրապարակումների մեջ նշված հանգամանքները պարզելու նպատակով։
«Ավետյանն ու Այվազյանը՝ որպես վկա, հրավիրվել են Հատուկ քննչական ծառայություն հարցաքննության, նրանց բացատրվել է իրենց իրավունքները, սակայն տարբեր պատճառաբանություններով նրանք խուսափել են ներկայանալ նախաքննական մարմին և տալ ցուցմունքներ, որոնք կարող են նպաստել հրապարակումներում նշված օրինախախտումների ստուգման նպատակով անհրաժեշտ օպերատիվ միջոցառումներ կատարելուն», - ասվում է տեղեկատվության մեջ։
Հատուկ քննչական ծառայությունից հիշեցրեցին, որ ՀՀ քրեական դատավարության օրենսգրքի 86-րդ հոդվածի 3-րդ մասի համաձայն՝ վկան պարտավոր է ցուցմունքներ տալ, քննչական և այլ դատավարական գործողությունների կատարմանը մասնակցելու համար ներկայանալ քրեական վարույթն իրականացնող մարմնի կանչով:
«Հատուկ քննչական ծառայությունը քաղաքացիական ակտիվություն և աջակցություն է ակնկալում ընտրախախտումների ականատես, հայտարարությունների հեղինակ քաղաքացիներից, հասարակական դիտորդներից և ԶԼՄ-ների ներկայացուցիչներից՝ ընտրությունների ընթացքում թույլ տրված օրինախախտումների բացահայտման գործում», - ընդգծվում է տեղեկատվության մեջ։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Կենտրոնական ընտրական հանձնաժողովի տվյալների համաձայն՝ Երևանի Ավագանու խորհուրդ են անցել անհրաժեշտ շեմը հաղթահարած երկու կուսակցություն և մեկ քաղաքական դաշինք։
Կենտրոնական ընտրական հանձնաժողովի տվյալներով, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
ԿԸՀ տվյալների համաձայն՝ ձայնի իրավունք ունեցող 771 477 քաղաքացուց ընտրություններին մասնակցել է 407745 մարդ կամ ընտրողների 52,85 տոկոսը։
Հայկական ընդդիմությունը պնդում է, որ ընտրությունների ընթացքում բազմաթիվ խախտումներ են տեղի ունեցել։
Եվրոպացի դիտորդները հայտարարել են, որ Երևանի ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։-0-
