ԵՐԵՎԱՆ, 1 հունիսի. /Նովոստի-Արմենիա/. Երևանի ավագանու խորհրդի ընտրություններն անցել են լուրջ խախտումներով, հայտարարեց Transparency International Տարածաշրջանային զարգացման կենտրոնի հայկական գրասենյակի տնօրեն Ամալյա Կոստանյանը։
«Երևանի ավագանու խորհրդի ընտրությունները ամենաանօրինական, անբարոյական ու ցինիկ ընտրություններն էին Հայաստանի ողջ պատմության ընթացքում»,- երկուշաբթի մամուլի ասուլիսի ժամանակ ասաց Կոստանյանը։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։Կենտրոնական ընտրական հանձնաժողովի նախնական տվյալների համաձայն՝ Երևանի Ավագանու խորհուրդ են անցել անհրաժեշտ շեմը հաղթահարած երկու կուսակցություն և մեկ քաղաքական դաշինք։
«Եթե մի երկրում տեղի են ունենում այնպիսի ընտրություններ, ինչպիսիք տեղի ունեցան 8-րդ ընտրատարածքում, իսկ մենք խոսում ենք միայն այդ տարածքի մասին, քանի որ մյուսներում չենք եղել, կարծում եմ, այդ երկիրը պետք է հայտարարի, որ երեկ ընտրական համակարգը՝ որպես ինստիտուտ, Հայաստանում մեռավ»,- ասաց Կոստանյանը։
Ընդդիմադիր ՀԱԿ տվյալներով, Transparency International կազմակերպության դիտորդները Մալաթիա-Սեբաստիայում 8-րդ տարածքի ընտրատեղամասերում հայտնաբերել են մարդկանց կուտակումներ ու քվեաթերթիկների լցոնման դեպքեր։
Կոստանյանի խոսքով, ընտրական համակարգի ինստիտուտը ընտրությունների ժամանակ շատ բարեհաջող կերպով փոխարինվեց «տեղական հեղինակությունների ինստիտուտով»։
«Այն, ինչ տեղի ունեցավ երեկ, կարելի է բնութագրել մեկ բառով, դա ցնցում էր, մենք բոլորս ցնցված ենք»,- հայտարարեց Կոստանյանը։
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն իր հերթին առանձին ընտրատեղամասերում որոշակի խախտումներ նշեց, այդ թվում՝ բաց քվեարկությունը, քվեաթերթիկների լցոնումը։
ԿԸՀ նախնական տվյալների համաձայն, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։
«Օրինաց երկիր» կուսակցությունը ստացել է 20959 ձայն կամ 5,22 տոկոս, Հայ հեղափոխական դաշնակցությունը ստացել է 18648 ձայն (4,65 տոկոս), Ժողովրդական կուսակցությունը՝ 8569 ձայն (2,14 տոկոս), Հայաստանի աշխատավորական սոցիալիստական կուսակցությունը՝ 1951 ձայն (0,49 տոկոս)։
ԿԸՀ նախնական տվյալների համաձայն՝ ձայնի իրավունք ունեցող 771 477 քաղաքացուց ընտրություններին մասնակցել է 407745 մարդ կամ ընտրողների 52,85 տոկոսը։ --0--
