Նախնական տվյալներով, Երևանի Ավագանու խորհրդի ընտրություններին մասնակցել է ընտրողների 52,85 տոկոսը, տեղեկացնում է ՀՀ ԿԸՀ նախագահ Գարեգին Ազարյանը։
«Ընտրելու իրավունք ունեցող 771 հազար 477 քաղաքացուց, նախնական տվյալներով, ընտրություններին մասնակցել է 407745-ը, ինչը ընտրողների 52,85 տոկոսն է»,- ասաց Ազարյանը:
Երևանում մայիսի 31-ին անցկացվեցին Ավագանու խորհրդի ընտրությունները: «Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:
Երևանի Ավագանու խորհրդի ընտրություններն անցկացվեցին համամասնական ընտրակարգով:
Ընտրություններին մասնակցեցին «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ --0—
