Երևանում ավարտվեցին ավագանու խորհրդի ընտրությունները

ԵՐԵՎԱՆ, 31 մայիսի. /Նովոստի-Արմենիա/. Երևանում ավարտվեցին ավագանու խորհրդի ընտրությունները։ Տեղական ժամանակով ուղիղ 20։00-ին փակվեցին բոլոր 439 ընտրատեղամասերը։ 

Մայիսի 31-ին Երևանում անցկացվեցին Ավագանու խորհրդի ընտրությունները: «Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:

Երևանի Ավագանու խորհրդի ընտրություններն անցկացվեցին համամասնական ընտրակարգով:

Ընտրություններին մասնակցեցին «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը:

ՀՀ Կենտրոնական ընտրական հանձնաժողովի մամուլի քարտուղար Տաթև Օհանյանի խոսքերով, ընտրությունների նախնական արդյունքները կհրապարակվեն 24 ժամվա ընթացքում։ Միաժամանակ նա նշեց, որ ԿԸՀ-ն պատրաստ է հայտարարությամբ հանդես գալ վաղ առավոտյան։

Ժամը 18։00-ի դրությամբ Երևանի Ավագանու խորհրդի ընտրություններին քվեարկել է ընտրելու իրավունք ունեցող քաղաքացիների 41,66 տոկոսը —0—