ԲՀԿ-ն հերքում է Երևանի ընտրատեղամասերից մեկում իր ներկայացուցչի վրա կրակելու մասին լուրերը

ԵՐԵՎԱՆ, 31 մայիսի. /Նովոստի-Արմենիա/. ՀՀ ԱԺ «Բարգավաճ Հայաստան» կոալիցիոն կուսակցության պատգամավոր Նաիրա Զոհրաբյանը հերքում է, որ Երևանի Նոր Նորք համայնքի ընտրատեղամասերից մեկում կրակել են կուսակցության ներկայացուցչի վրա։ 

«Այդ տեղեկատվությունը իրականությանը չի համապատասխանում։ Նման միջադեպ չի եղել»,- նշել է Զոհրաբյանը։ 

Ավելի վաղ մամուլում տարածվել էր տեղեկատվություն այն մասին, թե ընտրություններն ուղեկցվում են կրակոցներով, մասնավորապես Նոր Նորք համայնքում իբր կրակել են ՀՀԿ և ԲՀԿ ներկայացուցիչների վրա:

Հանրապետական կուսակցությունում ևս հերքել են Նոր Նորքում տեղի ունեցած հրաձգության մասին լուրերը՝ դատապարտելով ապատեղեկատվության տարածումը։

Երևանի Ավագանու խորհրդի ընտրություններն անցկացվում են համամասնական ընտրակարգով:

Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։  --0--