Ռուս սահմանապահները պատրաստ են հայ-թուրքական սահմանի բացմանը. ՀՀ-ում ԱԴԾ սահմանապահ վարչության պետ
ԵՐԵՎԱՆ, 27 մայիսի. /Նովոստի-Արմենիա/. Ռուս սահմանապահները պատրաստ են հայ-թուրքական սահմանի բացմանը, լրագրողներին հայտարարեց ՀՀ-ում ՌԴ ԱԴԾ սահմանապահ վարչության պետ, գեներալ-լեյտենանտ Սերգեյ Բոնդարյովը՝ Սահմանապահի օրվա կապակցությամբ ամփոփելով ընթացիկ տարվա միջակա արդյունքները։
«Հայ-թուրքական հարաբերությունների հարցը երկու պետությունների գործն է։ Մենք կկատարենք այն աշխատանքը, որը կդրվի մեր առաջ։ Սահմանապահ վարչության ստորաբաժանումները պատրաստ են սահմանի վրա ցանկացած աշխատանքի, այդ թվում և սահմանը բացելու մասին դրական որոշման ընդունման դեպքում»,- ասաց նա։
Հայաստանի և Թուրքիայի միջև անցակետերի վերականգնման աշխատանքների առնչությամբ սահմանապահ վարչության պետը հայտարարեց, որ Գյումրու կայարանից մինչև պետական սահմանն ընկած երկաթուղային պաստառի վերականգնման աշխատանքները դեռ անցյալ տարի են իրականացվել «ՀԿԵՈՒ» ՓԲԸ-ի կողմից, բայց որևէ ակտիվ միջոցառում նախկին անցակետերում չի նկատվում։
Ինչ վերաբերում է հայ-թուրքական սահմանին տիրող իրավիճակին, ապա Բոնդարյովը հայտնեց, որ սահմանապահ վարչությունը հնարավորինը վերահսկում է այն ամենը, ինչ կատարվում է սահմանակից պետության սահմանային շրջաններում՝ փոխգործակցելով ու տեղեկատվություն փոխանակելով Թուրքիայի սահմանապահների հետ։
Գեներալ-լեյտենանտը հավելեց, որ սահմանի մոտ թուրքական ԶՈՒ և քուրդ պարտիզանների միջև ռազմական բախումների դեպքերը պետական սահմանի իրադրության վրա ազդեցություն չեն գործում։ «Ընդհանուր առմամբ իրավիճակը սահմանի վրա հանդարտ է ու կայուն, և որևէ փոփոխություն տեղի չի ունենում»,- ամփոփեց նա։
Պետական սահմանի պաշտպանությունը սահմանապահ վարչության հատվածում 2008թ.-ին իրականացվել է ՀՀ և ՌԴ գործող սահմանադրություններին համապատասխան 1992թ.-ին ստորագրված «Հայաստանի տարածքում գտնվող ՌԴ գործող սահմանապահ զորքերի կարգավիճակի մասին» պայմանագրի, ինչպես նաև տվյալ պայմանագրին կից լրացուցիչ համաձայնագրերի համաձայն։
Հայաստանի տարածքում գործում է ՌԴ ԱԴԾ սահմանապահ վարչության 58 սահմանապահ ուղեկալ։-0-
