Երևանի ավագանու խորհրդի ընտրությունները երկրում որակապես նոր ներքաղաքական իրավիճակ կձևավորեն. «Ժառանգություն»

Երևանի քաղաքապետարանի ավագանու խորհրդի ընտրությունների ելքից անկախ՝ հանրապետությունում կձևավորվի որակապես նոր ներքաղաքական իրավիճակ, չորեքշաբթի մամուլի ասուլիսի ժամանակ ասաց «Ժառանգություն» խորհրդարանական ընդդիմադիր խմբակցության ղեկավար Արմեն Մարտիրոսյանը։

«Մայիսի 31-ից հետո հանրապետությունում տեղի կունենա լիցքաթափում, ինչին մեծամասամբ կնպաստի քաղբանտարկյալներին ներում շնորհելը, որը սպասվում է մայիսի 28-ին», - նշեց Մարտիրոսյանը։

ՀՀ ԱԺ նախագահ Հովիկ Աբրահամյանը չի բացառել, որ ՀՀ նախագահ Սերժ Սարգսյանը մայիսի 28-ին կհայտարարի նախորդ տարվա մարտի 1-ին Երևանում տեղի ունեցած անկարգությունների փաստով ձերբակալվածներին ներում շնորհելու մասին։

Մարտիրոսյանի կարծիքով՝ ազատ և ժողովրդավարական ընտրությունների դեպքում կհաղթի ընդդիմադիր Հայ ազգային կոնգրեսը։

Նա ընդգծեց, որ «Ժառագնության» պատգամավորները ակտիվորեն կմասնակցեն ընտրությունների կազմակերպման աշխատանքներին, «կվերահսկեն իրավիճակը՝ որևէ խախտում թույլ չտալու նպատակով»։

Մարտիրոսյանը կայանալիք ընտրությունների ժամանակ բարձր գնահատեց նաև ՀՅԴ-ի շանսերը և համակրանք արտահայտեց Դաշնակցություն կուսակցության կողմից առաջադրված թեկնածուների նկատմամբ։ Սակայն նա ընդգծեց, որ, այնուամենայնիվ, «Ժառանգությունը» աջակցում է ՀԱԿ-ին։

Մայիսի 31-ին տեղի կունենա Երևանի ավագանու խորհրդի ընտրությունները։ «Երևանում տեղական ինքնակառավարման մասին» նոր օրենքի համաձայն՝ խորհուրդը բաղկացած կլինի 65 անդամներից և կձևավորվի համամասնական համակարգով։ Խորհրդում տեղերի բացարձակ մեծամասնությունը ստացած կուսակցության ցուցակի առաջին համարն ավտոմատ կերպով դառնում է Երևանի քաղաքապետ։-0-