«Վերին Լարս» հսկիչ անցակետի բացումը շահավետ կլինի հայ արտադրողների և արտահանողների համար, կարծում է ՀՀ տրանսպորտի և կապի նախարար Գուրգեն Սարգսյանը։
«Եթե այս հսկիչ անցակետը սկսի գործել, ապա գյուղատնտեսական արտադրանքի տեղական արտադրողներն իրենց շատ ավելի լավ կզգան», - ասել է նա նախօրեին Հայաստանի հանրային հեռուստատեսությանը տված հարցազրույցում՝ ավելացնելով, որ խոսքը, մասնավորապես, ծիրանի և դեղձի արտահանման մասին է։
«Վերին Լարս» միջազգային ավտոմոբիլային անցակետի շինարարության ավարտի հանդիսավոր արարողությունը տեղի է ունեցել մայիսի 5-ին։ Ռուսաստանի և Վրաստանի միջև սահմանի միջազգային ավտոմոբիլային միակ անցակետը փակվել էր վերանորոգման նպատակով 2006 թ.-ի հուլիսին։ Սակայն անցակետը փաստացի չի գործում` Ռուսաստանի և Վրաստանի միջև դիվանագիտական հարաբերությունների բացակայության պատճառով։
ՀՀ արդյունաբերողների և ձեռներեցների (գործատուների) միության նախագահ Արսեն Ղազարյանն իր հերթին նշել է, որ մեկ բեռնատար ավտոմեքենայի տեղափոխման դեպքում կարելի է զգալիորեն տնտեսել լաստանավային փոխադրման համար վճարվող արժեքը։
«Կախված բեռի ծավալից և չափսերից՝ այդ գումարը տատանվում է 1,2-1,8 հազ. ԱՄՆ դոլարի սահմաններում», - պարզաբանել է նա։
Ղազարյանը նաև ավելացրել է, որ «Վերին Լարսի» միջոցով բեռների տեղափոխումը առավելություն է տալիս նաև ժամանակի և վառելիքի տնտեսման տեսանկյունից։
«Մեկ ուղևորության ընթացքում կարելի է 2-2,5 հազ. դոլար տնտեսել, ինչը բավականին զգալի գումար է», - ընդգծել է նա։
Վրաստանի ԱԳ նախարար Գրիգոլ Վաշաձեն երեքշաբթի հայտարարել է, որ վրացական կողմը պատրաստ է ռուս գործընկերների հետ բանակցություններ սկսել «Կազբեկի-Վերին Լարս» հսկիչ անցակետի բացման կապակցությամբ միայն շվեյցարական կողմի մասնակցության դեպքում։ Բանակցություններ սկսելու ռուսական նախաձեռնության մասին տեղեկատվությունը Վրաստանի ԱԳՆ-ն ստացել է Շվեյցարիայի դեսպանատան միջոցով։
«Կազբեկի-Վերին Լարս» հսկիչ անցակետի (ռուս-վրացական սահմանի ցամաքային հատվածի վրա միակ պաշտոնական անցակետը) միջոցով երթևեկությունը փակվել էր 2006 թ.-ի հուլիսին՝ ռուսական կողմի որոշմամբ։ Փակման պատճառը անցակետի վերանորոգման և այն ժամանակակից չափորոշիչներին համապատասխանեցնելու անհրաժեշտությունն էր։
«Վերին Լարս» անցակետի միջոցով երթևեկության բացման նկատմամբ հատուկ հետաքրքրություն է դրսևորում Հայաստանը։ Այս երթուղով Հայաստանը արտադրանք էր ներմուծում Ռուսաստան և երկու ուղղությամբ ուղևորային հաղորդակցություն էր ապահովում։-0-
