ԵՐԵՎԱՆ, 26 մայիսի. /Նովոստի-Արմենիա/. Զարգացման հայկական գործակալության խորհուրդը երեքշաբթի վարչապետ Տիգրան Սարգսյանի նախագահությամբ նիստի ժամանակ քննարկել է հայրենական ապրանքի արտասահման արտահանման խթանման հարցեր, հայտնում է կառավարության մամուլի ծառայությունը։
«Խորհուրդը քննարկել է ապրանքների արտահանման խթանման և նոր շուկաների ուսումնասիրման միջոցառումների ծրագիրը, որով նախատեսվում է աջակցել արտահանման ներուժ ունեցող ձեռնարկություններին նոր ծրագրերի ձևավորման հնարավորությունների գնահատման նպատակով, ինչպես նաև ձեռնարկել արտաքին շուկաների պահանջների հետազոտություն՝ արտաքին շուկայում տեղական ապրանքատեսականին առավել մրցունակ դարձնելու համար»,- ասվում է հաղորդագրության մեջ։
Ներկայացնելով գործակալության 2009թ. եռամսյակային հաշվետվությունը՝ գլխավոր գործադիր տնօրեն Ռոբերտ Հարությունյանը զեկուցել է նաև նախորդ նիստի հանձնարարականների կատարման ընթացքի մասին, նշել, որ 2009թ. ծրագրում ընդգրկված միջոցառումներում հստակ նշված են դրանց նպատակները, ակնկալվող արդյունքները և իրականացման պատասխանատուները:
Նիստում քննարկվել են «Զարգացման հայկական գործակալություն» ՓԲԸ-ի 2009թ. աշխատանքային ծրագրի, գործակալության գործունեության գնահատման չափանիշների, ինչպես նաև ՀՀ տեղեկատվական տեխնոլոգիաների ոլորտի բարելավման և զարգացման աջակցության հարցեր: Ներկայացվել են նաև «ԱրմԹեք» բարձր տեխնոլոգիաների ամենամյա համաժողովի կազմակերպման ընթացակարգի, «Շանհայ էքսպո-2010» համաշխարհային ցուցահանդեսի կազմակերպչական աշխատանքների ընթացքի, ինչպես նաեւ ԶՀԳ գործունեությանը վերաբերող ընթացիկ խնդիրներ:
Խորհուրդը հաստատել է «Զարգացման հայկական գործակալություն» ՓԲԸ-ի 2008թ. տարեկան հաշվետվությունը:-0-
