Գեղակարիչ Նիկոլ Աղաբաբյանի աշխատանքների ցուցահանդեսն է բացվել Երևանում
Երևանի Հովհաննես Թումանյանի թանգարանում բացվել է բնանկարիչ Նիկոլ Աղաբաբյանի աշխատանքների ցուցահանդեսը՝ նվիրված հայ գրականության դասականի 140-ամյա հոբելյանին։
Ցուցահանդեսին ներկայացվել է 61 աշխատանք, որոնք նկարիչը ստեղծել է 1992-2009 թթ.-ին։ Նկարներում պատկերված է հայրենի բնությունը վառ ուրախ երանգներով։
«Ես հոգնել եմ դժվար ու տխուր օրերից։ Այս լուսավոր գույները թախծի դեմ իմ բողոքի կոչն են»,- ասաց Աղաբաբյանը։
«Նկարներում պատկերված է գույների հրավառություն, դրանք լի են էներգիայով, միմյանց համահունչ բազում երանգներով»,- Նիկոլ Աղաբաբյանի աշխատանքների մասին ասաց ՀՀ վաստակավոր նկարիչ Հրանտ Թադևոսյանը։
Ցուցահանդեսի ժամանակ տեղի է ունեցել նաև նկարչի աշխատանքների հերթական ալբոմի շնորհանդեսը։
Նիկոլ Աղաբաբյանը հայտնի հայ բնանկարիչ է։ Նա ավելի քան 50 անհատական ցուցահանդեսներ է ունեցել Հայաստանում, Ռուսաստանում, ԱՄՆ-ում և Եվրոպայում։ 1992 թ.-ից ՀՀ Նկարիչների միության և ՅՈՒՆԵՍԿՕ-ի անդամ է։ --0--
