Երեքշաբթի Երևանում տեղի ունեցավ «Հակամարտությունների աշխարհը» հայ-ադրբեջանական համատեղ ծրագրի շրջանակներում նկարահանված ֆիլմերի շարքի շնորհանդեսը, «Նովոստի-Արմենիա» գործակալությանը հայտնեցին «Ինտերնյուս» կազմակերպությունից։
Ծրագրի շրջանակում երկու երկրների լրագրողները, ռեժիսորները և օպերատորները միասին նկարահանել են եվրոպական երկրների 6 տարբեր հակամարտությունների մասին պատմող «Հրաժեշտ զենքին Բելֆաստից մինչև Բալկաններ» հեռուստատեսային վավերագրական ֆիլմերի շարքը։
Ծրագիրն իրականացրել է «Ինտերնյուս Հայաստանն» իր ադրբեջանական գործընկերների հետ՝ Հայաստանում Բրիտանական դեսպանատան աջակցությամբ։
«Նախագծի նպատակն է փորձել պատմել ուրիշ եվրոպական հակամարտությունների մասին, որոնք երբեմն ընդհանուր գծեր ունեն Ղարաբաղյան հակամարտության հետ, ինչպես նաև նման հակամարտությունների լուծման համար ընդհանուր մեխանիզմ ներկայացնել»,- երեքշաբթի լրագրողներին ասաց «Ինտերնյուս Հայաստան» ՀԿ գործադիր տնօրեն Նունե Սարգսյանը։
Ֆիլմերում ներկայացված է տարբեր եվրոպական հակամարտությունների ծագման ու զարգացման պատմությունը, մարդկային ողբերգություններ ու պետական շահեր, պատմական դասեր ու հնարավոր լուծումներ։
Միջոցառման ընթացքում հեղինակները ներկայացրին իրենց ֆիլմերը։ Վերջում ցուցադրվեց քաղաքական մեկնաբան Արտյոմ Երկանյանի «Հաջողության կղզիները» ֆիլմը Ալանդյան կղզիների մասին։
Երկու ամիս «Ինտերնյուս Հայաստանի» գրասենյակում և Նարեկացի արվեստի կենտրոնում կցուցադրվեն համատեղ նկարահանված ֆիլմերը՝ «Ցավի ու հույսի միջև» (Բոսնիայի հակամարտության մասին), «Վստահության եզրին» (Հյուսիսային Իռլանդիայի մասին), «Անբաժան կղզի» (Կիպրոսի հակամարտության մասին), «Հաջողության կղզիներ» (Ալանդյան կղզիների մասին), «Սովորական անուրջ» (Բասկերի երկրի մասին)։
«Ինտերնյուս» ոչ առևտրային կազմակերպությունը գործունեությունը Հայաստանում սկսել է 1995 թ.-ին և զբաղվում է ԶԼՄ-ների աջակցությամբ։ Կազմակերպության հիմնական նպատակը անկախ ԶԼՄ-ներին սատարելն է հասարակությանը տեղեկատվության մեծ թվով անկախ և օբյեկտիվ աղբյուրներով ապահովելու համար։ «Ինտերնյուս Հայաստանը» Ինտերնյուս միջազգային ընկերակցության հիմնադիրն ու անդամն է։ -0-
