ԵՐԵՎԱՆ, 25 մայիսի. /Նովոստի-Արմենիա/. Աշխարհահռչակ դաշնակահար Եվգենի Կիսինն ու հռչակավոր ջութակահար ու դիրիժոր Վլադիմիր Սպիվակովը պարգևատրվել են «Վալերի Բրյուսով» մեդալով հայ-ռուսական մշակութային ու մարդասիրական կապերի զարգացման գործում ունեցած ներդրման համար, հայտնում է ռուսաստանի հայերի «Երկրամաս» թերթը»: Պարգևների հանձնումը կայացել է նախօրեին Մոսկվայի Պետական կոնսերվատորիայի Մեծ դահլիճում։
«Մոսկվայի վիրտուոզները» պետական կամերային նվագախմբի 30-ամյակին նվիրված հոբելյանական համերգի ավարտին մրցանակները շնորհելիս՝ Հայաստանի հետ բարեկամության ու համագործակցության Ռուսական կազմակերպության նախագահ Վիկտոր Կրիվոպուսկովն ասաց, որ Եվգենի Կիսինին ու Վլադիմիր Սպիվակովին մեդալները շնորհվել են և որպես համաշխարհային կատարողական արվեստի ականավոր գործիչների, և որպես ռուս մեծ մարդասեր Վալերի Բրյուսովի փառավոր ավանդույթների շարունակողի՝ համամարդկային արժեքներին մեծապես հավատարիմ լինելու համար»,- ասվում է հաղորդագրության մեջ։
«Այսօրվա Ձեր համերգը, բնականաբար, ֆենոմենալ է, բայց քչերին է հայտնի, որ Սպիտակի երկրաշարժից հետո արդեն 20 տարի շարունակ Դուք բազմաթիվ համերգներ եք տվել ողբերգության զոհերին, հատկապես հայ մանուկներին օգնելու նպատակով»,- հայտարարեց Կրիվոպուսկովը։ Պարգևները շնորհվեցին մոսկովյան լայն հանրության ու Սպիտակ քաղաքի ներկայացուցիչների ներկայությամբ։
1988 թ.-ի Հայաստանի երկրաշարժի մասին լուրը Եվգենի Կիսինին ու Վլադիմիր Սպիվակովին հասավ Իտալիայում, որտեղ նրանք համերգներ էին տալիս։ Այդ ժամանակից ի վեր նրանք բազմաթիվ բարեգործական համերգներ են տվել, որոնց հասույթն ուղղում են «Հայաստանի մանուկներ» հիմնադրամին և Սպիտակի որբ երեխաներին։ Համերգներից ստացված հասույթի մի մասն էլ տրամադրվել է Սեյսմիկ պաշտպանության ազգային ծառայությանն ու ծախսվել Գյումրիի գիմնազիայի շինարարության, ինչպես նաև համակարգիչներ գնելու վրա։ Եվգենի Կիսինը Սպիտակ քաղաքի պատվավոր քաղաքացի է։ Վլադիմիր Սպիվակովը պարգևատրվել է Հայաստանի բարձր մրցանակով՝ Սբ. Մեսրոպ Մաշտոցի շքանշանով։ -0-
