ԵՐԵՎԱՆ, 25 մայիսի. /Նովոստի-Արմենիա/. ՀՀ Ազգային գրադարանում կայացավ բրազիլական գրականության դասական դարձած Մաշադու դե Ասիզի (1839-1908) ստեղծագործությունների երկլեզու ժողովածուի շնորհանդեսը։
Ժողովածուն հրատարակվել է Գերցենի անվ. ՌՊՄՀ պորտուգալերեն լեզվի ու մշակույթի կենտրոնի կողմից, Մոսկվայում Բրազիլիայի դեսպանատան ու այդ երկրի ԱԳՆ սատարմամբ։
Գրքում ընդգրկված են հինգ ժողովածուներից ընտրված ստեղծագործություններ։ Իր պատմվածքներում բրազիլական գրականության դասականը պատկերում է ժամանակակից բրազիլացուն ձևավորող հոգեբանական, բարոյագիտական և բարոյական առանձնահատկություններ։ Մաշադու դե Ասիզը մարդկային հոգին մանրամասն ուսումնասիրող անգերազանցելի վարպետ է։
Երևանում շնորհանդեսն անցկացվեց Հայաստանում Բրազիլիայի դեսպան Ռենատե Ստելեի (Renate Stille) բարձր հովանու ներքո, Ազգային գրադարանի և «Բրազիլ ցանց» ակումբի աջակցությամբ։
«Այս մշակութային միջոցառումը պատահական չէ, որ դարձավ վերջինը Հայաստանում Բրազիլիայի դեսպանի իմ կարիերայում»,- շնորհանդեսի ժամանակ ասաց Ստիլեն, որը մոտ ժամանակներում կզբաղեցնի Բրազիլիայի դեսպանի պաշտոնը Նոր Զելանդիայում։
Բրազիլացի դիվանագետը ցանկություն և պատրաստակամություն հայտնեց հետագայում ևս սատարել երկրների միջև երկկողմ մշակութային կապերի զարգացմանը։
Դեսպանը հպարտությամբ նշեց, որ Հայաստանում իր առաքելությունը կատարելու ընթացքում երկրների միջև մշակութային հարաբերությունների զարգացման շրջանակներում ինքը եղել է հայկական երկու առաջատար բուհերում «Պորտուգալերեն լեզվի» կենտրոնի բացման նախաձեռնողը։
Ստիլեն նշեց նաև, որ Բրազիլիայում Հայաստանի դեսպանատան բացումը բարենպաստ ազդցություն կունենա երկու պետությունների միջև քաղաքական ու մշակութային հարաբերությունների զարգացման վրա։ -0-
