Հայաստանը շահագրգռված է Ռուսաստանը Վրաստանի հետ կապող «Վերին Լարս» հսկիչ անցակետի շուտափույթ գործարկմամբ, ասել է ՀՀ վարչապետ Տիգրան Սարգսյանը լրագրողներին՝ պատասխանելով «Նովոստի-Արմենիա» գործակալության հարցին։
«Վերին Լարս» միջազգային ավտոմոբիլային անցակետի շինարարության ավարտի հանդիսավոր արարողությունը տեղի է ունեցել մայիսի 5-ին։ Ռուսաստանի և Վրաստանի միջև սահմանի միջազգային ավտոմոբիլային միակ անցակետը փակվել էր վերանորոգման նպատակով 2006 թ.-ի հուլիսին։ Սակայն անցակետը փաստացի չի գործում` Ռուսաստանի և Վրաստանի միջև դիվանագիտական հարաբերությունների բացակայության պատճառով։
«Վերին Լարսը» գտնվում է Վլադիկավկազ քաղաքից 38 կմ դեպի հարավ՝ վրացական ռազմական ճանապարհի ուղղությամբ։
«Մենք չափազանց շահագրգռված ենք, որպեսզի այդ ճանապարհը գործի։ Ռուսաստանը մեզ հավաստիացրել է, որ իրենց կողմից բոլոր աշխատանքներն ավարտված են։ Առաջնահերթ նշանակությունը նրանք տալիս են այն փաստին, որպեսզի Վերին Լարս անցակետն աշխատի, ավելին՝ նրանք համալրել են այդ անցակետը ժամանակակից սարքավորումներով», - ասել է Սարգսյանը։
Նա հույս է հայտնել, որ վրացի գործընկերները ջանքեր կգործադրեն, որպեսզի անցակետը սկսի գործել, և հայկական կողմը կարողանա ապրանքներ տեղափոխել։
Սարգսյանը նշել է, որ ՀՀ կառավարության ներկայացուցիչներն այդ հարցի շուրջ բանակցություններ են վարում վրացական կողմի հետ։
«Վերին Լարսի»թողունակությունը կկազմի օրական մինչև 400 ավտոմեքենա, ինչը կապահովի նաև տրանսպորտային միջոցների 12 շարքով երթևեկությունը և երկու լրացուցիչ շարք՝ ռեզերվային երթևեկության համար։ Նախագծով նախատեսված է նաև օրական մինչև 600 ավտոմեքենա երթևեկելու հեռանկարային զարգացման հնարավորությունը։-0-
