Խորվաթիայի նախագահը պարգևատրվել է ԵՊՀ Ոսկե մեդալով
ԵՐԵՎԱՆ, 22 մայիսի. /Նովոստի-Արմենիա/. Խորվաթիայի նախագահ Ստյեպան Մեսիչը պարգևատրվել է ԵՊՀ Ոսկե մեդալով։
Պարգևը Խորվաթիայի նախագահին հանձնեց ԵՊՀ ռեկտոր Արամ Սիմոնյանը ուսանողների և մանկավարժական կազմի հետ հանդիպման ժամանակ։
Մեսիչին է շնորհվել նաև ԵՊՀ պատվավոր դոկտորի կոչում։ Համալսարանի ռեկտորի խոսքով՝ Խորվաթիայի նախագահի այցը Հայաստան առաջընթաց է երկու երկրների համագործակցության խորացման գործում։
«Հայ-խորվաթական հարաբերությունները երկար պատմություն չունեն, բայց մենք վստահ ենք, որ Ձեր այցը Հայաստան ոչ միայն վկայում է հարաբերությունները զարգացնելու ցանկության մասին, այլև նշանավորում է նոր փուլ փոխշահավետ համագործակցության համար ամուր հիմքեր հաստատելու հարցում։
Իր հերթին Մեսիչը նշեց, որ ինքը Խորվաթիայի՝ Հայաստան այցելած առաջին նախագահն է, այդ իսկ պատճառով «այցն ավելի շուտ ճանաչողական բնույթ է կրում»։ «Մեզ անհրաժեշտ է ավելի լավ ճանաչել միմյանց»,- ընդգծեց նախագահը։
Նա համառոտ ուսանողներին ծանոթացրեց Խորվաթիայի պատմությանը, ներքաղաքական իրավիճակին և հանրապետության արտաքին քաղաքականության հիմնական ուղղություններին։
Մեսիչն առաջին աշխատանքային այցով մայիսի 21-23-ը Երևանում է գտնվում ՀՀ նախագահի հրավերով։ Խորվաթիայի նախագահի՝ Հայաստան առաջին այցի հիմնական նպատակն է ամրապնդել միջպետական կապերը, նախանշել երկու երկրների միջև տնտեսական համագործակցության առաջնային ուղղություններն ու խնդիրները, խթանել գիտակրթական և մշակութային կապերի զարգացումը: --0--
