ՀՀ ոստիկանությունը շնորհավորել է շրջանավարտներին «վերջին զանգի» կապակցությամբ և կոչ է արել ծնողներին չվստահել ավտոմեքենաներն իրենց երեխաներին

ՀՀ ճանապարհային ոստիկանությունը շնորհավորում է շրջանավարտներին ուսումնական տարվա ավարտի և արդեն ավանդական դարձած «վերջին զանգի» կապակցությամբ, ասաց  Ճանապարհային ոստիկանության պլանավորման, հաշվառման, վերլուծության բաժնի պետ Հայկ Սարգսյանը:

«Ճանապարհային ոստիկանությունը ձեռնարկել է անհրաժեշտ բոլոր քայլերը, որպեսզի այդ օրն ապահովի անխափան ու անվտանգ երթևեկություն։ Մենք խնդրում ենք և պահանջում բոլոր վարորդներից՝ դրսևորել բարձր կարգապահություն, ավելի հարգալից լինել հետիոտնի և զբոսնող շրջանավարտների նկատմամբ, ովքեր իրենց հերթին պետք է զբոսնեն միայն մայթերով և այն տեղերով, որոնք հատկացված են հետիոտնին՝ չզբաղեցնելով երթևեկելի մասը»,- ասաց նա մամուլի ասուլիսում։
     
Միաժամանակ Սարգսյանը զգուշացրեց բոլոր ծնողներին ոչ մի դեպքում չտրամադրել անչափահասներին իրենց ավտոմեքենաները։ Նա նշեց, որ ցանկացած նման դեպք չի մնա Ճանապարհային ոստիկանության ուշադրությունից դուրս, և այն մեքենաները, որոնց ղեկին անչափահասներ կլինեն, կտարվեն Ճանապարհային ոստիկանության կայանատեղի։

Վերջին զանգի տոնը Հայաստանում կնշվի մայիսի 23-ին։  Ամեն տարի «վերջին զանգի» տոնին արձանագրվում են ավտովթարների բազմաթիվ դեպքեր շրջանավարտների մասնակցությամբ։ -0-