Լեռնային Ղարաբաղի հակամարտությունը պետք է լուծել բացառապես բանակցությունների միջոցով, կարծում է Խորվաթիայի նախագահ Ստյեպան Մեսիչը։
«Ավելի լավ է 10 տարի բանակցություններ վարել, քան թեկուզ 10 օր պատերազմել»,- ուրբաթ Երևանում մամուլի ասուլիսի ժամանակ հայտարարեց նա։
Խոսելով Խորվաթիայի փորձի մասին՝ երկրի նախագահը հիշեցրեց, որ Հարավսլավիայի սահմանադրությամբ՝ դրա կազմում գտնվող հանրապետությունները սահմանվել են որպես պետություն, իսկ ինքնավար մարզերը՝ որպես սահմանադրական տարրեր կամ դաշնության բաղկացուցիչներ։
«Եթե չլինեին այն ուժերը , որոնք որպես հարցի լուծում ընտրեցին պատերազմը և փորձեցին փոփոխել սահմանները, մենք մեր բոլոր խնդիրները կկարողանայինք լուծել խաղաղ ճանապարհով։ Բայց, ցավոք, ռազմական լուծումը հաղթեց, և մենք հսկայական մարդկայն կորուստներ ունեցանք, իսկ սահմանները մեկ միլիմետր անգամ չփոխվեցին»,- հայտարարեց Մեսիչը՝ նշելով, որ ռազմական գործողությունների արդյունքում նախկին հանրապետություններն անկախ պետություններ դարձան։
«Անհրաժեշտություն առաջացավ լուծել Կոսովոյի մարզի կարգավիճակը։ Սերբիան ներուժ չուներ ոչ Կոսովոյում իր իշխանությունը հաստատելու, ոչ հետագա բանակցություններ վարելու համար։ Արդյունքում Կոսովոն հռչակեց իր անկախությունը, և ի հայտ եկավ նոր իրականություն, որը մենք ճանաչեցինք»,- նշեց նա։
Կոսովոյի ալբանական իշխանությունը 2008 թ.-ի փետրվարի 17-ին, ԱՄՆ և ԵՄ առաջատար երկրների սատարմամբ, միակողմանի կերպով հռչակեց Սերբիայից իր անկախությունը։
Սերբիան և Ռուսաստանը հրաժարվում են ճանաչել Կոսովոն անկախ պետություն՝ հայտարարելով, որ երկրամասի միակողմանի քայլն իր նոր կարգավիճակը հռչակելով կոպիտ խախտում է միջազգային իրավունքի նորմերը։
Խորվաթիայի նախագահ Ստյեպան Մեսիչը նախօրեին երեկոյան Երևան է ժամանել ՀՀ նախագահ Սերժ Սարգսյանի հրավերով։ Խորվաթիայի նախագահի Հայաստան առաջին այցի հիմնական նպատակը, որի ընթացքում կսահմանվեն երկու երկրների միջև տնտեսական համագործակցության առաջնահերթ ուղղություններն ու խնդիրները, միջպետական հարաբերությունների ամրապնդումն է, գիտակրթական և մշակութային կապերի զարգացման խթանումը։ -0-
