ՀՀ նախագահ Սերժ Սարգսյանը մայիսի 28-ին կհայտարարի 2008թ.-ի մարտի 1-ի անկարգությունների գործով ձերբակալվածների նկատմամբ համաներում շնորհելու մասին, «Ազատություն» ռադիոկայանին տեղեկացրել է ՀՀ ԱԺ խոսնակ Հովիկ Աբրահամյանը։
Փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել ավելի քան 200 մարդ։
«Առաջին Հանրապետության ազգային տոնի կապակցությամբ՝ մայիսի 28-ին, ՀՀ նախագահը հանդես կգա համաներում շնորհելու մասին հայտարարությամբ», - ասել է Աբրահամյանը։
Խորհրդարանի նիստի ընթացքում խոսնակը համոզմունք է հայտնել, որ մարտի 1-2-ի գործով երեք հայ պատգամավորի ձերբակալության հետ կապված գործընթացները շուտով դրական լուծում կստանան։
«Մենք հետևում ենք գործընթացներին։ Ես համոզված եմ, որ այդ գործընթացները ընթանում են դրական հունով, և մենք դրական արդյունքի կհանգենք», - ասել է Աբրահամյանը։
Ռադիոկայանին տված մեկնաբանության մեջ խոսնակը նշել է, որ չի կարող բացել փակագծերն ու լրացուցիչ մեկնաբանություններ տալ։ «Հավատացեք և վստահեք իմ խոսքերին», - ասել է խորհրդարանի խոսնակը։
Մայիսի 28-ին Հայաստանում նշում են Առաջին Հանրապետության օրը (1918-1920 թթ.)։-0-
