ԵՐԵՎԱՆ, 22 մայիսի. /Նովոստի-Արմենիա/. ԱՄՆ Կոնգրեսում ներկայացված՝ Հայոց ցեղասպանության ճանաչումը նախատեսող №252 բանաձևին աջակցող կոնգրեսականների թիվը հասել է 125-ի, հաղորդում է Ամերիկայի հայկական համագումարը:
«Համագումարը շարունակում է կոնգրեսականներին՝ բանաձևին հավանություն տալու առնչությամբ իրենց կոնգրեսականների հետ շփումներ հաստատելու միջոցով №252 բանաձևի ընդունման կարևորության մասին տեղեկացնելու աշխատանքները»,- ասաց ԱՀՀ գործադիր տնօրեն Բրայան Արդունին՝ ավելացնելով, որ Հայոց ցեղասպանության ճանաչումը նախատեսող բանաձևի ընդունումը կուղղվի ցեղասպանությունների հետագա կանխարգելմանը:
Օրենսդրական նախաձեռնությունը Կոնգրեսի ներկայացուցիչների պալատում առաջադրել են Ադամ Շիֆֆը, Ջորջ Ռադանովիչը և Կոնգրեսի ներկայացուցիչների պալատի Հայաստան-ԱՄՆ խմբի համանախագահներ Ֆրենկ Պալոնեն ու Մարկ Կիրկը:
Փաստաթղին նախորդել է 106 բանաձևը, որը ձայների մեծամասնությամբ ընդունվել է 110-րդ գումարման Կոնգրեսի ներկայացուցիչների պալատի Արտաքին գործերի կոմիտեի կողմից:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորհուրդը, Կանադայի խորհրդարանի համայնքների պալատը և Լեհաստանի սեյմը։--0—
