ՀՀ վարչապետ Տիգրան Սարգսյանը մասնակցում է Ղազախստանի նախագահ Նուրսուլթան Նազարբաևի հետ ԱՊՀ երկրների կառավարությունների ղեկավարների հանդիպմանը, հաղորդում է «Նովոստի-Արմենիա» գործակալությանը թղթակիցը։
ՀՀ վարչապետի Տիգրան Սարգսյանի գլխավորած հայկական պատվիրակությունը երկօրյա աշխատանքային այցով ժամանել է Աստանա նախօրեին։
Ընդհանուր առմամբ Աստանա են ժամանել ԱՊՀ 11 երկրի պատվիրակություններ։ Վրաստանը չի մասնակցում նիստին։
Ինչպես «Նովոստի-Արմենիա» գործակալությանը տեղեկացրեցին ԱՊՀ գործադիր կոմիտեից, տեղական ժամանակով ժամը 11։00-ին (Երևանի ժամանակով ժամը 10։00-ին) տեղի կունենա նեղ շրջանակում ԱՊՀ կառավարությունների ղեկավարների խորհրդի նիստի բացումը, որի ընթացքում կքննարկվեն մասնավորապես համաշխարհային ֆինանսատնտեսական ճգնաժամի հետևանքների նվազմանն առնչվող հարցերը։ Դրանից հետո նիստը կշարունակվի ընդլայնված կազմով։ Նիստից հետո կստորագրվեն համատեղ համաձայնագրեր։
ԱՊՀ կառավարությունների ղեկավարների խորհրդի նիստի ընթացքում ծրագրվում է ազդարարել մինչև 2020 թվականը ԱՊՀ տնտեսական զարգացման ռազմավարության իրագործման մեկնարկը, որը հավանության է արժանացել 2008թ.-ի նոյեմբերի 14-ին Քիշնևում կայացած Կառավարությունների ղեկավարների խորհրդի նիստի ժամանակ։
Աստանայում կայանալիք հանդիպման ընթացքում նախատեսվում է հաստատել այդ ռազմավարության առաջին փուլի իրագործմանն ուղղված միջոցառումների ծրագիրը, որը վերաբերում է արդյունաբերության մեջ համագործակցական կապերի զարգացմանը, ԱՊՀ տարածքում առևտրի ընդլայնման համար բարենպաստ պայմանների ստեղծմանը։
Բացի այդ, հավաքական միջոցներ են նախատեսված բնապահպանության և շրջակա միջավայրի պաշտպանության ոլորտում, ինչպես նաև գիտատեխնիկական, նորարարական և կրթական ոլորտներում համագործակցության ընդլայնման գործում։
Նախատեսված են մի շարք քայլեր ԱՊՀ երկրների տնտեսությունների վրա գլոբալ ֆինանսական ճգնաժամի բացասական ազդեցությանը հակազդելու ուղղությամբ։
Նախատեսվում է նաև քննարկել 2009-2010թթ.-ին հումանիտար համագործակցության ոլորտում ԱՊՀ միջոցառումների ծրագիրը
Խորհրդի շրջանակներում կքննարկվեն ընդհանուր կրթական տարածքի հետագա զարգացմանն ուղղված միջոցառումների և մինչև 2010 թվականը կրթության ոլորտում համագործակցության ծրագիրը, ինչպես նաև Մեծահասակների կրթության զարգացման հայեցակարգի իրագործմանն ուղղված միջոցառումների ծրագիրը։ -0-
