Հայաստանը Մինսկում մասնակցեց կրթական հարցեր քննարկող համաժողովին

ԵՐԵՎԱՆ, 20 մայիսի. /Նովոստի-Արմենիա/. Բելառուսի Հանրապետության մայրաքաղաք Մինսկում տեղի ունեցավ «Միջին մասնագիտական կրթություն և կրթություն կայուն զարգացման համար» թեմայով միջազգային համաժողով, որին մասնակցում էր  ՀՀ կրթության և գիտության նախարարության պատվիրակությունը` նախարարի տեղեկալ Արա Ավետիսյանի գլխավորությամբ, չորեքշաբթի «Նովոստի-Արմենիա» գործակալությանը հայտնեցին նախարարության մամուլի ծառայությունից։

Համաժողովը նպատակ ուներ ձևավորել արդյունավետ զարգացման ուղիներ ԱՊՀ մասնակից երկրների տնտեսական և սոցիալական ոլորտներում կադրային պահանջների բավարարման, ՄԿՈՒ դերի բարձրացման, ինչպես նաև ԱՊՀ տարածքում որակավորված բանվորական կադրերի պատրաստման գործընթացում տարածաշրջանային համագործակցության ամրապնդման համար:

Միջազգային համաժողովն անցկացվեց Բելառուսի Հանրապետության կրթության նախարարության և ԱՊՀ մասնակից երկրների կրթության նախարարների կոնֆերանսի նախաձեռնությամբ և ԱՊՀ գործադիր կոմիտեի, Մոսկվայում UNESCO-ի  բյուրոյի, ԱՊՀ մասնակից պետությունների մարդասիրական համագործակցության միջպետական հիմնադրամի,  Կրթության եվրոպական հիմնադրամի,  ՄԿՈՒ միջազգային կենտրոնի (UNESCO-UNEVOC), UNESCO-ի  կրթության տեղեկատվական տեխնոլոգիաների ինստիտուտի, InWent միջազգային կազմակերպության և Ժողովրդական համալսարանների գերմանական ասոցիացիայի (DVV) համագործակցությամբ:

Համաժողովին զուգահեռ անցկացվեց ԱՊՀ մասնակից երկրների կրթության նախարարների XVI խորհրդաժողովը, որի ընթացքում քննարկվեցին մասնակից երկրների շրջանակում մասնագիտական կրթության և ուսուցման, ԱՊՀ-ի և UNESCO-ի միջև համագործակցության զարգացման հեռանկարները: -0-