ԵՐԵՎԱՆ, 19 մայիսի. /Նովոստի-Արմենիա/. Ղարաբաղյան հիմնահարցի բանակցություններին միջամտելու Թուրքիայի ցանկացած փորձ բացասաբար կանդրադառնա կարգավորման գործընթացի վրա, երեքշաբթի խորհրդարանում հայտարարեց Հանրապետական կուսակցության խմբակցության քարտուղար Էդուարդ Շարմազանովը։
«Մենք կարծում ենք, որ բանակցություններին միջամտելու Թուրքիայի ցանկացած փորձ բացասաբար կանդրադառնա կարգավորման գործընթացի վրա։ Ղարաբաղը չի կարող Ադրբեջանի կազմում լինել, և միակ հարցը, որ անհրաժեշտ է լուծել, ԼՂՀ կարգավիճակի հարցն է»,- ասաց Շարմազանովը։
Նա ընդգծեց, որ Ղարաբաղը ինքնորոշվել է միջազգային իրավունքի բոլոր նորմերի համաձայն և պաշտպանել իր իրավունքը մարտի դաշտում, իսկ այժմ ձևավորում է իր ժողովրդավարական ինստիտուտները։
Ընդ որում նա հիշեցրեց, որ Հայաստանը դրական է գնահատել ՀՀ և Ադրբեջանի նախագահներ Սերժ Սարգսյանի և Իլհամ Ալիևի վերջերս կայացած պրահյան հանդիպումը, «որը թույլ տվեց համաձայնեցնել կարգավորման ուղղությամբ գործադրվող ջանքերը»։
Մայիսի 7-ին Պրահայում տեղի ունեցավ ՀՀ և Ադրբեջանի նախագահների բանակցությունները դեմ առ դեմ, ինչպես նաև երկու երկրների ԱԳՆ ղեկավարների, ԵԱՀԿ ՄԽ համանախագահների և գործող նախագահի հատուկ ներկայացուցչի մասնակցությամբ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
