ՀՀ նախագահը ցավակցություն է հայտնել հայազգի բուլղարացի գրող Սևդա Սևանի մահվան կապակցությամբ

ԵՐԵՎԱՆ, 18 մայիսի. /Նովոստի-Արմենիա/. ՀՀ նախագահ Սերժ Սարգսյանը ցավակցություն է հայտնել հայազգի հանրահայտ բուլղարացի գրող Սևդա Սևանի մահվան կապակցությամբ, երկուշաբթի «Նովոստի-Արմենիա» գործակալությանը հայտնեցին ՀՀ պետության ղեկավարի մամուլի ծառայությունից։

«Խոր ցավով տեղեկացա Հայաստանի Հանրապետության արտակարգ և լիազոր դեսպան, բուլղարահայ գրող Սևդա Սևանի անժամանակ մահվան մասին: Սևդա Սևանը օտարագիր հայ նորագույն գրականության ակնառու ներկայացուցիչներից էր: Նրա ստեղծագործությունը կրում է հայրենազրկման հսկայական ցավի կնիքը, որն ունեն Հայոց ցեղասպանությունը վերապրած մեր հարյուր հազարավոր հայրենակիցներն ու նրանց ժառանգները»,- ասվում է նախագահի ուղերձում:

Սարգսյանի խոսքերով, գրականությունն այն միջոցն էր, որով նա բարձրացնում էր ճշմարտության ձայնն ընդդեմ ուրիշի ցավի նկատմամբ աշխարհի լռության ու անտարբերության: «Նա ձգտում էր խոսքի ուժով ամրացնել մարդկության դիմադրությունը  նմանօրինակ ոճիրների կրկության հանդեպ»,- ասվում է ուղերձում:

Նախագահի խոսքերով, Հայաստանի Հանրապետության անկախացումից հետո, երկար տարիներ պաշտոնավարելով որպես մեր երկրի ներկայացուցիչ եղբայրական Բուլղարիայում, նա իր ավանդն էր բերում հայ-բուլղարական հարաբերությունների ամրապնդմանն ու զարգացմանը, մեր ժողովուրդների ու մշակույթների փոխադարձ հարստացմանն ու ճանաչողությանը:

«Սևդա Սևանը անմնացորդ սիրում էր Հայաստանն ու Արցախը: Նա մեր երկրի, հայ և բուլղար մշակույթների անմնացորդ նվիրյալներից էր, ում գործերը հավերժ հիշեցնելու են մեր ժողովրդի վերապրած ողբերգության և վերածննդի մասին»,- ասվում է ուղերձում:

«Իմ ցավակցությունն ու զորակցությունն եմ հայտնում անվանի գրողի հարազատներին, մերձավորներին ու նրա գրականության երկրպագուներին»,- նշել է երկրի ղեկավարը:-0-