ՀՀ գլխավոր դատախազ Աղվան Հովսեփյանը բացառիկ է համարում ՌԴ դատախազության հետ համագործակցությունը։
«Հայաստանն ու Ռուսաստանն առաջին անգամ կիրառեցին միջազգային իրավական հարաբերությունների փորձը, երբ մեր դատախազությունները ստորագրեցին ոչ միայն իրավական օգնության ու համագործակցության հուշագիր, այլև որոշակի ծրագիր այդ հուշագրի ներքո»,- ասաց ՀՀ գլխավոր դատախազը Չեխիայի գլխավոր դատախազ Ռենատա Վեսեցկայի հետ համագործակցության հուշագիր կնքելուց հետո։
Նրա խոսքով, համանման ծրագիր կստորագրվի Չեխիայի հետ։
«Հանցավորության դեմ պայքարին վերաբերող առանձին հարցեր մենք արդեն իրականացնում ենք այն երկրների հետ, որոնց հետ երկկողմ համաձայնագիր ունենք կնքած և ոչ միայն դիվանագիտական ալիքներով, այլև ուղղակիորեն, ուղիղ համագործակցության միջոցով։ Շատ հարցեր, անհրաժեշտությունից ելնելով, մենք լուծում ենք հեռախոսակապի միջոցով, օպերատիվ կերպով արձագանքելով առանձին հարցերինն»,- ասաց Հովսեփյանը։
Հուշագրի շրջանակներում կողմերը պայմանավորվեցին սերտ համագործակցության մասին հարցերի լայն շրջանակի վերաբերյալ, մասնավորապես, թրաֆիքինգի դեմ պայքարի և անօրինական միգրացիայի կանխարգելման ուղղությամբ։ Կողմերը պայմանավորվեցին նաև ակտիվացնել կապերը քաղաքացիների և իրավաբանական անձանց իրավունքների և ազատությունների պաշտպանության հարցերում։-0-
