Հայ-թուրքական հարաբերությունների հաստատումը և սահմանի բացումը ոչ միայն կառույցաստեղծ նշանակություն ունի տարածաշրջանում աշխարհաքաղաքական կայություն և անվտանգություն ապահովելու համար, այլև կարող է երաշխավորել Ղարաբաղյան կարգավորման արդարացի լուծումներ գտնելը, ասաց Քրիստոնեադեմոկրատական միության նախագահ, նախկին վարչապետ և ՀՀ ԱԺ նախկին խոսնակ Խոսրով Հարությունյանը։
«Հայ-թուրքական սահմանի բացումն ու երկու երկրների միջև հարաբերությունների հաստատումը անվտանգության երկարատև հեռանկարներից է բխում»,- երկուշաբթի «Նովոստի» միջազգային մամուլի կենտրոնում ասաց նա։
Հարությունյանը դրական գնահատեց այն քաղաքական կուրսը, որ այս հարցում բռնել է ՀՀ ղեկավարությունը։
«Այս պատմական կծիկը քանդելն այնքան էլ հեշտ չէ, դրա համար ժամանակ է պետք։ Մտածելակերպի փոփոխություն է անհրաժեշտ ոչ միայն իշխանական կատույցներում, այլև հասարակական շրջաններում և հատվածներում, ընդ որում այս հարցը միևնույն չափով վերաբերում է թե Հայաստանին, թե Թուրքիային»,- կարծում է նա։
ՀՔԴՄ առաջնորդը խոսելով այն մասին, որ Հայաստանի և Թուրքիայի միջև սահմանը պետք է բացել, ընդգծեց, որ դա միայն Հայաստանի շահերից չի բխում։
«Տարածաշրջանում հնգօրյա պատերազմից հետո ստեղծված որակապես նոր իրավիճակում սա ուղղակիորեն բխում է Թուրքիայի շահերից։ Եվ եթե նա հավակնում է տարածաշրջանում ազդեցիկ պետություն լիելու դերին, ապա չի կարող հասնել դրան առանց Հայաստանի հետ հարաբերությունները կարգավորելու, դա բացառվում է»,- ասաց նա՝ հավելելով, որ Թուրքիայի շահագրգռվածությունը հարաբերությունների կարգավորման հարցում ավելի մեծ է, քանի որ նա «ավելի շատ բան կկորցի, քան Հայաստանի կշահի»։
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993թ.-ից՝ պաշտոնական Անկարայի նախաձեռնությամբ:
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։
Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դաշնային դեպարտամենտն ապրիլի 23-ի գիշերը հարաբերությունների կարգավորման համատեղ հայտարարություն են արել: Հայտարարության մեջ ասվում է, որ կողմերը համաձայնության են հանգել իրենց երկկողմ հարաբերությունների կարգավորման համապարփակ շրջանակի շուրջ երկու կողմերին գոհացնող կերպով: Այս համատեքստում սահմանվել է ճանապարհային քարտեզ:-0--
