Երկուշաբթի Երևանում Փոխըմռնման մասին հուշագիր են ստորագրել Հայաստանի և Չեխիայի գլխավոր դատախազներ Աղվան Հովսեփյանն ու Ռենատա Վեսեցկան։
«ՀՀ գլխավոր դատախազությունը կարևորում է բոլոր երկրների, հատկապես եվրոպական պետությունների գլխավոր դատախազությունների հետ երկկողմ համաձայնագրերի ստորագրումը։ Մենք արդեն ունենք նման հաջող փորձ», - ասաց ՀՀ գլխավոր դատախազը։
Նրա խոսքերով՝ հայկական կողմը կարևորում է նմանատիպ համաձայնագրերի ստորագրումը նաև Չեխիայի հետ՝ հաշվի առնելով Չեխիայում բնակվող և աշխատող ՀՀ քաղաքացիների, ինչպես նաև Չեխիայի հայազգի քաղաքացիների զգալի թիվը։
«Այս համաձայնագիրը կնպաստի Հայաստանի և Չեխիայի իրավական համակարգերի բազմաթիվ հարցերի օպերատիվ լուծման գործում», - ասաց Հովսեփյանը։
Նրա խոսքերով՝ երկուշաբթի տեղի է ունեցել Հայաստանի և Չեխիայի գլխավոր դատախազությունների կոլեգիաների համատեղ նիստը։
Հովսեփյանի խոսքերով՝ կոլեգիայի ընթացքում քննարկվել են երկու երկրների միջև միջազգային իրավական համագործակցությանը վերաբերող բազմաթիվ հարցեր, ինչպես նաև այդ գործում համաշխարհային փորձը։ Նա նաև ասաց, որ երկու երկրների գլխավոր դատախազությունների միջև կստորագրվի գործողությունների համապատասխան ծրագիր։ Հովսեփյանը շնորհակալություն հայտնեց Չեխիային Եվրատեսիլ-2009 մրցույթում հայ երգչուհիներին տրված ամենաբարձր գնահատականի համար։
Վեսեցկան իր հերթին ասաց, որ կոլեգիայի ընթացքում քննարկվել են հանցավորության մակարդակի նվազմանն ու համագործակցության զարգացմանն առնչվող քայլերը։ Նրա խոսքերով՝ ստորագրված Հուշագիրը հիմք է հանդիսանում փոխգործակցության մակարդակի բարձրացման և լուրջ արդյունքների ձեռքբերման համար։
«Մենք որոշեցինք, որ, իսկապես, սերտ համագործակցություն է անհրաժեշտ։ Ստորագրված Հուշագիրը միայն հիմք է հանդիսանում մեր ապագա աշխատանքների համար», - ասաց Վեսեցկան։ Նրա խոսքերով՝ չեխական կողմը պատրաստ է փորձի փոխանակում կատարել։ «Կրթություն ունենալը բավարար չէ, անհրաժեշտ է նաև փորձ ունենալ։ Եվ փորձի փոխանակումն այն գործի հիմքն է, որը լավ արդյունքների կհանգեցնի», - նշեց Չեխիայի գլխավոր դատախազը։
Հուշագրի շրջանակներում կողմերը պայմանավորվեցին սերտ համագործակցության մասին հարցերի լայն շրջանակի վերաբերյալ, մասնավորապես, թրաֆիքինգի դեմ պայքարի և անօրինական միգրացիայի կանխարգելման ուղղությամբ։ Կողմերը պայմանավորվեցին նաև ակտիվացնել կապերը քաղաքացիների և իրավաբանական անձանց իրավունքների և ազատությունների պաշտպանության հարցերում։-0-
