Հայաստանը ծրագրում է մինչև 2010 թ.-ը լիովին հրաժարվել օզոնային շերտը քայքայող նյութերի մի մասից. ՀՀ բնապահպանության փոխնախարար

Հայաստանը ծրագրում է մինչև 2010 թ.-ը ամբողջովին հրաժարվել օզոնային շերտը քայքայող քլորֆտորածխածիններից, «Օզոնային շերտը քայքայող նյութերի մասին» Մոնրեալի արձանագրության շրջանակներում գործող Արևելյան Եվրոպայի և Կենտրոնական Ասիայի 5-րդ հոդվածի երկրների տարածաշրջանային ցանցի ամենամյա խորհրդակցության բացման ժամանակ հայտարարեց ՀՀ բնապահպանության փոխնախարար Սիմոն Պապյանը։

«Ձեռնարկված միջոցառումների արդյունքում մեզ հաջողվել է 85 տոկոսով կրճատել քլորֆտորածխածինների օգտագործումը, և ծրագրվում է մինչև 2010 թ.-ը ամբողջովին դրանք հանել օգտագործումից», - տեղեկացրեց փոխնախարարը։

Պապյանն ավելացրեց, որ 2005 թ.-ին Գլոբալ բնապահպանական հիմնադրամի աջակցությամբ ՀՀ բնապահպանության նախարարությունում բացվել է Օզոնային ազգային գրասենյակ, որի համակարգման ժամանակ իրականացվում է օզոնային շերտը քայքայող նյութերի արգելքին ուղղված ազգային ծրագիր։

Նա նաև նշեց, որ եթե 2005 թ.-ին Հայաստանում գրանցվել է Մոնրեալի արձանագրության պայմանների խախտում, ապա 2006-2007 թթ.-ին «Օզոնային շերտը քայքայող նյութերի մասին» օրենքի, ինչպես նաև ենթաօրենսդրական ակտերի փաթեթի ընդունման արդյունքում կրկին հաջողվել է հասնել արձանագրության բոլոր պայմանների ամբողջական պահպանման։

1987 թ.-ին ընդունված «Օզոնային շերտը քայքայող նյութերի մասին» Մոնրեալի արձանագրությանն անդամակցում են 195 երկիր։ Արձանագրությունը ստորագրած կողմերը պարտավորվել են դադարեցնել օզոնի շերտը քայքայող նյութերի արտադրությունը, կիրառումը, փոխադրումն ու դրանց հետ կապված այլ գործողությունները։

Պապյանի խոսքերով՝ 2005-2008 թթ.-ին անցկացված հետազոտոությունների համաձայն՝ Հայաստանի մթնոլորտում օզոնի մակարդակը կազմում է XX դարի 70-ական թթ.-ի բնական մակարդակի 86-88 տոկոսը, սակայն Հայաստանի վրա երբեմն նկատվում է օզոնային փոքր անցքերի անցում, որոնցից վերջինը գրանցվել է 2008 թ.-ի հոկտեմբերին։

Ամենամյա հանդիպմանը մասնակցում են Մոնրեալի արձանագրության շրջանակներում Արևելյան Եվրոպայի և Կենտրոնական Ասիայի տարածաշրջանային ցանցի (ECA  network) մեջ մտնող ինը երկրների պատվիրակություններ. դրանք են Հայաստանը, Ալբանիան, Բոսնիա և Հերցեգովինան, Վրաստանը, Ղրղզստանը, Մակեդոնիան, Մոլդովան, Սերբիան և Թուրքմենստանը, անցումային տնտեսություն ունեցող երեք երկրներ՝ Ղազախստանը, Տաջիկստանն ու Թուրքմենստանը, ինչպես նաև Հունգարիայի և Ռումինիայի ներկայացուցիչները։

Բացի երկրների պատվիրակություններից հանդիպմանի մասնակցում են տարբեր միջազգային կազմակերպությունների ներկայացուցիչներ, մասնավորապես, ՄԱԿ-ի Զարգացման ծրագրի (UNDP), ՄԱԿ-ի արդյունաբերական զարգացման կազմակերպության (UNIDO), ՄԱԿ-ի շրջակա միջավայրի ծրագրի (UNEP), ինչպես նաև մասնավոր ընկերությունների ներկայացուցիչներ, տեխնիկական և քաղաքական  փորձագետներ։

Հանդիպումը կշարունակվի մինչև մայիսի 22-ը։-0-