ՀՀ նախագահը շաբաթ օրը ՌԴ փոխվարչապետ Սերգեյ Իվանովի հետ քննարկել է հայ-ռուսական համագործակցությանն առնչվող հարցեր, «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից։
«Ողջունելով բարձրաստիճան հյուրի այցը՝ նախագահը համոզմունք է հայտնել, որ այն լրացուցիչ խթան կլինի հայ-ռուսական ռազմավարական դաշնակցային հարաբերությունների ընդլայնման համար», - ասվում է մամուլի հաղորդագրության մեջ։
ՀՀ նախագահն ու ՌԴ փոխվարչապետը գոհունակությամբ արձանագրել են երկու երկրների ռազմավարական հարաբերությունների և քաղաքական երկխոսության ներկա բարձր մակարդակը, ինչի լավագույն վկայությունն է զարգացող փոխգործակցությունը տարբեր ոլորտներում, կյանքի կոչվող նոր նախաձեռնություններն ու ծրագրերը:
Սարգսյանն ու Իվանովը բարձր են գնահատել նաև գործընկեր երկրների միջև առևտրատնտեսական կապերի զարգացման դինամիկան և հումանիտար ոլորտում համագործակցության բարձր մակարդակը։
Հանդիպման ընթացքում կողմերը քննարկել են տնտեսության տարբեր բնագավառներում, այդ թվում տրանսպորտի, հեռահաղորդակցության, էներգետիկայի և այլ ոլորտներում փոխգործակցությանն առնչվող հարցեր։
Զրուցակիցներն անդրադարձել են նաև ղարաբաղյան հակամարտության կարգավորման գործընթացին, մտքեր փոխանակել տարածաշրջանային ու միջազգային օրակարգի տարբեր հարցերի շուրջ:
ՀՀ նախագահը մեկ անգամ ևս շեշտել է, որ հայ-թուրքական հարաբերությունների կարգավորման հարցում որևէ նախապայման ուղղակի բացառված է և վերահաստատել մեր երկրի պատրաստակամությունը առանց նախապայմանների Թուրքիայի հետ կարգավորելու հարաբերությունները։
Նա նաև ընդգծել է, որ Թուրքիայի կողմից Լեռնային Ղարաբաղի հակամարտության կարգավորման գործընթացին որևէ միջամտության փորձ կարող է միայն բացասաբար անդրադառնալ արցախյան հիմնախնդրի կարգավորման բանակցային գործընթացի վրա։-0-
