ԵՐԵՎԱՆ, 15 մայիսի. /Նովոստի-Արմենիա/. «Նաիրիտ» գործարանում տեղի ունեցած հրդեհի արդյունքում մթնոլորտի էական աղտոտում չի արձանագրվել, ուրբաթ լրագրողներին հայտնեց ՀՀ բնապահպանության նախարարության Պետական բնապահպանական տեսչության պետի տեղակալ Մարզպետ Քամալյանը։
«Էական աղտոտում չկա, և չէր կարող լինել»,- ասաց Քամալյանը՝ հավելելով, որ պայթյունի ժամանակ բռնկում է տեղի ունենում, իսկ օրգանիկան հիմնականում այրվում է։
Ըստ նրա, իրականությանը չեն համապատասխանում նաև խմելու ջրին կամ ջրային պաշարներին սպառնացող վտանգի մասին լուրերը։
Քամալյանն ասաց, որ շրջապատող միջավայրի վրա հրդեհի ազդեցության վերաբերյալ վերջնական գնահատականները կհրապարակվեն վերլուծության արդյունքները ստանալուց հետո։
Իր հերթին, ՀՀ առողջապահության նախարար Հարություն Քուշկյանը նշեց, որ այսօր կվերցվեն ջրի նմուշներ։ Նա ավելացրեց, որ դեպքի ժամանակ բոլոր բուժծառայություններն աշխատել են ամբողջ ծավալով, և հիվանդանոցները եղել են ուժեղացված պատրաստվածության վիճակում։ -0-
