ԵՐԵՎԱՆ, 15 մայիսի. /Նովոստի-Արմենիա/. ՀՀ նախագահ Սերժ Սարգսյանը կարգադրել է պարզել երեկ «Նաիրիտ» քիմգործարանում տեղի ունեցած հրդեհի պատճառները։ Այդ մասին լրագրողներին ուրբաթ օրը հայտնեց նախագահը գործարան այցելելուց հետո։
Տարածաշրջանում կաուչուկի խոշորագույն «Նաիրիտ» գործարանում պայթյուն է տեղի ունեցել նախօրեին տեղական ժամանակով երեկոյան ժամը վեցի սահմաններում, երկրորդ հերթափոխի աշխատանքի սկզբին։ Հրդեհի հետևանքով զոհվել է գործարանի չորս աշխատակից։
«Երեկ ես ցուցումներ եմ տվել համապատասխան հետաքննություն անցկացնելու նպատակով, անհրաժեշտ է պարզել պատճառները հետագայում նման դեպք թույլ չտալու համար»,- նշեց Սարգսյանը։
Նախագահը «Նաիրիտ»-ի ողբերգությունը լուրջ փորձություն անվանեց հանրապետության համապատասխան ծառայությունների համար, «որոնց աշխատակիցները, վտանգելով իրենց կյանքը, կարողացան գործել գրագիտորեն և առանց հապաղելու»։
«Դժբախտաբար, այս ողբերգությունն ուղեկցվեց զոհերով, և փառք Աստծուն, որ զոհերի թիվն ավելի մեծ չէ։ Ես խորապես ցավակցում եմ զոհվածների և տուժածների ընտանիքներին։ Իհարկե, զոհվածների ընտանիքների նկատմամբ ուշադրությունը սեփականատիրոջ և պետմարմինների կողմից չի կարող փոխհատուցել նրանց կորուստը, բայց գոնե կմխիթարի նրանց»,- ասաց Սարգսյանը։
Երկրի ղեկավարի կարծիքով, անհրաժեշտ է դասեր քաղել տեղի ունեցած ողբերգությունից, որը հերթական ազդանշան պետք է դառնա հանրապետության այլ ձեռնարկությունների ղեկավարների և սեփականատերերի համար։
Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ ՀՀ Քրեական օրենսգրքի երկու հոդվածի՝ 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով :
«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-
