«Նաիրիտ» գործարանում բռնկված հրդեհի արդյունքում այրված արտադրամասը կարող է վերականգնվել մեկ ամսում
ԵՐԵՎԱՆ, 15 մայիսի. /Նովոստի-Արմենիա/. Հայկական «Նաիրիտ» քիմիական գործարանում բռնկված հրդեհի արդյունքում այրված արտադրամասը կարող է վերականգնվել մեկ ամսում, ուրբաթ լրագրողներին հայտարարեց ՀՀ էներգետիկայի նախարար Արմեն Մովսիսյանը։
«Հետազոտություններ են անցկացվել, և մասնագետները հաստատում են, որ աշխատանքային ռիթմն արտադրամասում կարելի է վերականգնել մեկ ամսում»,- ասաց նա։
Մովսիսյանի խոսքերով, արտադրամասի վերականգնման համար կպահանջվի շուրջ 150 հազար ԱՄՆ դոլար։
Նախարարը նշեց, որ գործարանում ժամանակ առ ժամանակ տեխնիկական անվտանգության ապահովման աշխատանքներ են անցկացվում, և փորձագիտական հանձնաժողովն անցկացվելիք աշխատանքների արդյունքում կպարզի հրդեհի պատճառները։
«Պետք է պատճառները պարզել, որպեսզի հետո գնահատականներ տալ»,- ասաց նախարարը։ Ընդ որում նա ավելացրեց, որ հավանական պատճառների թվում դիտարկվում է «սրհեստական միջամտությունը գործարանի աշխատանքին» վարկածը։ Նախարարի կարծիքով, հրդեհի պատճառներից մեկը կարող է լինել տեխնոլոգիական գործընթացի խախտումը։
Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ ՀՀ Քրեական օրենսգրքի երկու հոդվածի՝ 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով :
Տարածաշրջանի կաուչուկի խոշորագույն հսկայի՝ «Նաիրիտի» պայթյունը որոտացել է տեղական ժամանակով ժամը 18:00-ի սահմաններում:
Դեպքի հետևանքով մահացել է չորս մարդ, տուժել է 17 փրկարար: Կրակը հանգցրել է 27 մարտական հաշվարկ։ Դեպքի վայրում աշխատել են քննչական մարմինների ներկայացուցիչները:
«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-
