ԵՐԵՎԱՆ, 15 մայիսի. /Նովոստի-Արմենիա/. Հայաստանն ու Թուրքիան լուրջ առաջընթաց են գրանցել երկկողմ երկխոսություն հաստատելու բանակցություններում, ուրբաթ Երևանում լրագրողներին ասաց Հարավային Կովկասում Մեծ Բրիտանիայի հատուկ ներկայացուցիչ Բրայան Ֆոլը։
Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դաշնային դեպարտամենտն ապրիլի 23-ի գիշերը հարաբերությունների կարգավորման համատեղ հայտարարություն են արել: Հայտարարության մեջ ասվում է, որ կողմերը համաձայնության են հանգել իրենց երկկողմ հարաբերությունների կարգավորման համապարփակ շրջանակի շուրջ երկու կողմերին գոհացնող կերպով: Այս համատեքստում սահմանվել է ճանապարհային քարտեզ:
«Կարծում եմ, որ ՀՀ-ի և Թուրքիայի կառավարությունները լուրջ առաջընթաց են գրանցել բանակցություններում և հուսով եմ, որ ձեռք բերված համաձայնագիրը, որի մանրամասները ոչ ոքի հայտնի չեն, բարենպաստ կլինեն ինչպես Հայաստանի, այնպես էլ Թուրքիայի և ընդհանուր առմամբ ողջ տարածաշրջանի համար»,- ասաց Ֆոլը։
Ընդ որում նա հույս հայտնեց, որ ԱՄՆ կառավարությունը, որը նույնպես ընդգրկված է գործընթացում, աջակցություն կցուցաբերի կարգավորման հարցում, և տարաձայնություններ առաջ չեն գան, քանի որ փաստաթուղթը կարևոր է ինչպես հայկական, այնպես էլ թորքական կողմի համար։
«Մենք միշտ պնդել ենք, որ ուժը այն ձևաչափը չէ, որով պետք է առաջնորդվել, անհրաժեշտ է հակամարտությունները խաղաղ ճանապարհով լուծել»,- ասաց Ֆոլը։
Ինչ վերաբերում է հայ-թուրքական սահմանի բացման հնարավոր ժամկետներին, ապա, ինչպես կարծում է դիվանագետը, դա հնարավոր չէ կարճաժամկետ հեռանկարում։
«Ես շատ կզարմանամ, եթե Թուրքիայի հետ Հայաստանի սահմանը չբացվի մինչև երկրի ԵՄ անդամ դառնալը, չնայած ստույգ ժամկետներ ասելը դժվար է»,- ասաց Ֆոլը։
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993 թ.-ից՝ Անկարայի նախաձեռնությամբ։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
