Հայաստանը կարևորում է Հարավ-Արևելյան Ասիայի երկրների հետ հարաբերությունների ընդլայնումը. նախագահ

ԵՐԵՎԱՆ, 14 մայիսի. /Նովոստի-Արմենիա/. Հայաստանը կարևորում է Հարավ-Արևելյան Ասիայի երկրների և այդ տարածաշրջանում մեծ դերակատարություն ունեցող Ինդոնեզիայի հետ հարաբերությունների ընդլայնումը, հինգշաբթի ասաց ՀՀ նախագահ Սերժ Սարգսյանը՝ ընդունելով ՀՀ-ում Ինդոնեզիայի նորանշանակ դեսպան Նինինգ Սունինգսիհ Ռոխադիաթի (Nining Suningsih Rochadiat, նստավայրը` Կիև) հավատարմագրերը, «Նովոստի-Արմենիա» գործակալությանը հայտնեցին երկրի ղեկավարի մամուլի ծառայությունից:

Շնորհավորելով նորանշանակ դեսպանին` երկրի ղեկավարը  հույս է հայտնել, որ նա իր մեծ նպաստը կբերի տարբեր ոլորտներում երկկողմ համագործակցության զարգացմանը: Գործարար կապերի խթանման համար կողմերն առաջնային են համարել տեղեկատվության փոխանակումը և ակտիվ շփումները:

Զրուցակիցներն անդրադարձել են նաև մի շարք տարածաշրջանային խնդիրների, կարևորել են փոխգործակցությունը միջազգային կազմակերպությունների շրջանակում, ինչպես նաև մտքեր են փոխանակել գլոբալ ֆինանսատնտեսական ճգնաժամի և դրա հետևանքների շուրջ:--0--