Այրվում է տարածաշրջանի կաուչուկի խոշորագույն հսկան՝ «Նաիրիտ» գործարանը

ԵՐԵՎԱՆ, 14 մայիսի. /Նովոստի-Արմենիա/. Հայաստանում այրվում է տարածաշրջանի կաուչուկի խոշորագույն հսկան՝ «Նաիրիտ» գործարանը, հինգշաբթի «Նովոստի-Արմենիա» գործակալությանը տեղեկացրեց ՀՀ Արտակարգ իրավիճակների նախարարությանն առընթեր փրկարար ծառայության պետի խորհրդական Նիկոլայ Գրիգորյանը։

«Հրդեհը բավականին ուժեղ է և երևում է քաղաքի գրեթե բոլոր կողմերից»,- ասաց Գրիգորյանը։

Ականատեսների խոսքերով՝ այրվում է ձեռնարկության արտադրամասերից մեկը։

Պատահարի մանրամասներն անհայտ են։ Որոշ տվյալներով՝ գործարանում պայթյուն է եղել։   

Պատահարի վայրում աշխատում է մի քանի մարտական հաշվարկ։

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ Տարիների պարապուրդից հետո ձեռնարկության աշխատանքը մասնակիորեն վերսկսվել է 1992-93թթ.-ին:

2006 թ.-ից գործարանի 90 տոկոս բաժնետոմսերի տերը  բրիտանական Rhinoville Property Limited կոնսորցիումն է, մնացած 10 տոկոս բաժնետոմսերը պատկանում են ՀՀ կառավարությանը՝ ի դեմս Էներգետիկայի և բնական ռեսուրսների նախարարության։  

Գործարանի միջին ամսական հզորությունը 700-750 տոննա արտադրանք է կազմում, սակայն իրական ամսական ծավալները տատանվում են 900-950-ից մինչև 500 տոննա քլորոպրենային կաուչուկ։ -0-