ԵՐԵՎԱՆ, 14 մայիսի. /Նովոստի-Արմենիա/. Ժողովրդավարական ԼՂՀ-ն չի կարող գտնվել ավտորիտար Ադրբեջանի կազմում, կարծում է Քաղաքական զարգացումների հետազոտական կենտրոնի տնօրեն Վահան Դիլանլյանը։
«Հայաստանի դիրքերի ամրապնդումը ղարաբաղյան հակամարտության բանակցային գործընթացում ուղեկցվում է Ադրբեջանի անհավասարակշռված քայլերով, ինչի մասին վկայում են Ադրբեջանի կողմից հրադադարի ռեժիմի բազմաթիվ խախտումները համապատասխան համաձայնագրի ստորագրումից հետո»,- ասաց Դիլանյանը հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ։
Բացի այդ, նրա խոսքերով, 2009 թ.-ի մարտին գործող նախագահ Իլհամ Ալիևի լիազորությունների ժամկետի երկարացման մասին հանրաքվեի ընթացքում կասկածի տակ դրվեց Ադրբեջանի ժողովրդավարացման հնարավորությունը։
Դիլանյանը նշեց, որ իր հերթին ԵԱՀԿ ՄԽ համանախագահների ավելի հաճախակի դարձած այցերը Ղարաբաղ վկայում են Ադրբեջանի կազմում ժողովրդավարական ԼՂՀ-ի գտնվելու անընդունելիության մասին։
Դիլանյանը դրական գնահատեց այն, որ ԵԱՀԿ ՄԽ համանախագահների՝ Պրահայում Հայաստանի և Ադրբեջանի ղեկավարների հանդիպման արդյունքներով հայտարարություններում հաստատվում է հայ-թուրքական ու հայ-ադրբեջանական հարաբերությունների առանձին գոյության փաստը և արտացոլվում է նրանց միաձայն դիրքորոշումը բանակցային գործընթացի բոլոր սկզբունքների վերաբերյալ։
«Դրական է նաև այն, որ համանախագահների հայտարարություններում անուղղակիորեն նշվում է բանակցություններում ԼՂՀ մասնակցության անհրաժեշտությունը և նշանակություն է տրվում Լեռնային ղարաբաղի անկախությանը»,- ընդգծեց Դիլանյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։ Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
