ԵՐԵՎԱՆ, 14 մայիսի. /Նովոստի-Արմենիա/. Հայաստանը կարևորում է մասնակցությունը տարբեր միջազգային կառույցներին՝ սեփական անվտանգության և կայուն զարգացման ապահովման համար, ասաց ՀՀ պաշտպանության նախարար Սեյրան Օհանյանը։
«Մենք համոզված ենք, որ տարածաշրջանում կայունության և անվտանգության ապահովման տեսակետից միջազգային կազմակերպությունների և համապատասխան ծրագրերի ռեսուրսներն ու հնարավորություններն ամենևին էլ սպառված չեն։ Ուստի մենք նպատակ ունենք խորացնել նմանատիպ կազմակերպությունների հետ մեր համագործակցությունը բոլոր այն հարցերի շուրջ, որոնց նկատմամբ մեր շահերն ու մոտեցումները չեն տարբերվում», - հինգշաբթի Երևանում ասաց Օհանյանը՝ ելույթ ունենալով «Վերագնահատելով անվտանգ միջավայրը Հարավային Կովկասում. տարածաշրջանային հակամարտություններ, կայունություն և կերպափոխում» թեմայով միջազգային խորհրդաժողովի ժամանակ։
Նախարարը կարևորեց Հայաստանի մասնակցությունն այնպիսի միջազգային կառույցներին, ինչպիսիք են ՀԱՊԿ-ը, ԱՊՀ-ն, ԵԱՀԿ-ը, Եվրոպայի Խորհուրդը, ՍԾՏՀ-ն։
«Հայաստանն ակտիվորեն համագործակցում է նաև ՆԱՏՕ-ի և դաշինքի առանձին անդամ-երկրների հետ՝ Եվրատլանտյան գործընկերության խորհրդի և «Գործընկերություն հանուն խաղաղության» ծրագրի շրջանակներում», - ընդգծեց Օհանյանը։
Նրա խոսքերով, Հայաստանը ՆԱՏՕ-ի հետ իրականացնում է «Անհատական գործընկերության գործողությունների» ծրագիրն ու մասնակցում է ՆԱՏՕ-ի կողմից ձեռնարկված «Պլանավորման և վերանայման գործընթացին»։
Նախարարն ասաց, որ Հայաստանի նախաձեռնող և հավասարակշիռ արտաքին քաղաքականության ապացույցը Հայաստան-ՆԱՏՕ «Գործընկերություն հանուն խաղաղության» ծրագրի շրջանակներում հանրապետությունում անցկացվող «Ռուբեժ-2008» և «Համատեղ աղեղ» և «Համատեղ նիզակակիր» զորավարժությունների անցկացումն է։-0-
