Հայաստանը տարածաշրջանային անվտանգության և կայունության ապահովմանն ուղղված յուրաքանչյուր նախաձեռնության կողմնակիցն է. ՀՀ պաշտպանության նախարար
Հայաստանը տարածաշրջանում կայունության և անվտանգություն ապահովմանն ու ամրապնդմանն ուղղված յուրաքանչյուր նախաձեռնության կողմնակիցն է, հայտարարել է ՀՀ պաշտպանության նախարար Սեյրան Օհանյանը։
«Տարածաշրջանում կայունության ապահովմանն ուղղված նախաձեռնություններից մեկը նախորդ շաբաթ մեկնարկած Եվրամիության «Արևելյան գործընկերություն» ծրագիրն է, որն ընդգրկում է Հարավային Կովկասի բոլոր երեք պետությունները», - հինգշաբթի Երևանում ասաց Օհանյանը՝ ելույթ ունենալով «Վերագնահատելով անվտանգ միջավայրը Հարավային Կովկասում. տարածաշրջանային հակամարտություններ, կայունություն և կերպափոխում» թեմայով միջազգային կոնֆերանսի ժամանակ։
Նրա խոսքերով, մեկ այլ նախաձեռնություն է 2009 թ.-ի փետրվարին ՀԱՊԿ արագ արձագանքման ուժերի ստեղծումն ու Հարավային Կովկասում Անվտանգության և համագործակցության հարթակի ստեղծման վերաբերյալ Թուրքիայի առաջարկությունը։
«Հավատարիմ մնալով տարածաշրջանում կայունության և համագործակցության մթնոլորտի ստեղծմանը նպաստող դիրքորոշմանը՝ Հայաստանը մասնակցում է այդ նախաձեռնությունների ձևավորման շուրջ ընթացող բանակցություններին», - ասաց նախարարը։
Նրա խոսքերով, տարածաշրջանում կայունության և վստահության մթնոլորտի հաստատման տեսակետից զգալի նշանակություն ունեն նաև 2008 թ.-ին ՀՀ նախագահ Սերժ Սարգսյանի նախաձեռնած բարձր մակարդակի հայ-թուրքական բանակցությունները։
Միաժամանակ Օհանյանը ընդգծեց, որ Հայաստանը միշտ կողմ է եղել և այժմ էլ հավատարիմ է առանց նախապայմանների Թուրքիայի հետ դիվանագիտական հարաբերությունների հաստատմանը։
Նախարարը հայտարարեց, որ ղարաբաղյան հակամարտության խաղաղ կարգավորման համար կարևոր նշանակություն ունի 2008 թ.-ի նոյեմբերին ՌԴ նախագահ Դմիտրի Մեդվևեդի միջնորդությամբ Մայնդորֆյան եռակողմ հռչակագրի ստորագրումը, որը ղարաբաղյան հակամարտության խաղաղ կարգավորման այլընտրանքի բացակայության լրացուցիչ ապացույցն է։
Երևանում մայիսի 14-15-ն անցկացվող խորհրդաժողովը կազմակերպվել է ՀՀ պաշտպանության նախարարությանն առընթեր Ազգային ռազմավարական հետազոտությունների ինստիտուտի կողմից և Լիոնի անվտանգ միջավայրի և պաշտպանական հետազոտությունների միջազգային կենտրոնի կողմից։-0-
