ԵՐԵՎԱՆ, 13 մայիսի. /Նովոստի-Արմենիա/. ՀԱՊԿ գլխավոր քարտուղար Նիկոլայ Բորդյուժան կմասնակցի «Անվտանգությունը և համագործակցությունը Կովկասում» միջազգային կոնֆերանսին, որը կանցկացվի Երևանում մայիսի 14-15-ը, տեղեկացնում է ՀԱՊԿ մամուլի ծառայությունը։
Միջոցառման ընթացքում նախատեսվում է միջազգային համագործակցության, անվտանգության և տարածաշրջանում ճգնաժամային իրավիճակների կարգավորման ապահովմանը վերաբերող խնդիրների լայն շրջանակ քննարկել։
Մասնավորապես, համաժողովի մասնակիցները կքննարկեն Հարավային Կովկասի՝ որպես ժամանակակից եվրոպական անվտանգության բաղկացուցչի, անվտանգության տարածաշրջանային, էթնոքաղաքական հակամարտությունների կարգավորման, միջազգային ահաբեկչությանը դիմակայելու ոլորտում տարածաշրջանային համագործակցության զարգացման, թմրանյութերի և զենքի անօրինական շրջանառության, տարածաշրջանային տեղեկատվական անվտանգության ապահովման հարցեր։
«Ես համոզված եմ, որ Հարավային Կովկասում և հատկապես նրա հարավային հատվածում անվտանգության ապահովման և մարտահրավերներին դիմակայելու խնդիրների լայն շրջանակի քննարկումը օգտաբեր կլինի ոչ միայն տարածաշրջանի երկրների, այնև բոլոր նրանց համար, ովքեր նրանց խաղաղություն և բարգավաճում են կամենում»,- հայտարարեց Բորդյուժան Երևան մեկնելուց առաջ։
ՀԱՊԿ գլխավոր քարտուղարն ընդգծեց, որ տարածաշրջանում դինամիկ փոփոխությւոնների պայմաններում, այդ թվում՝ սահմանների հնարավոր բացման դեպքում և, համապատասխանաբար, մարդկանց և բեռների առավել մեծ շարժունակության պայմաններում սերտ համակարգումը գլոբալ, տարածաշրջանային և այլ կազմակերպությունների միջև հատկապես անհրաժեշտ է։ «ՀԱՊԿ-ն նման համագործակցության պատրաստ է»,- պարզաբանեց Նիկոլայ Բորդյուժան։ -0-
