ԵՐԵՎԱՆ, 12 մայիսի. /Նովոստի-Արմենիա/. Հայկական բջջային օպերատորները ներկայացրել են երգի միջազգային «Եվրատեսիլ 2009» մրցույթի շրջանակներում անցկացվող հեռուստաքվեարկության պայմանները։
Ինչպես հայտնում են հայկական հեռահաղորդակցական օպերատորներ «ԱրմենՏել» ՓԲԸ-ն («Beeline» ապրանքանիշ) և VivaCell-MTS-ը, Հայաստանը կարող է քվեարկել և կիսաեզրափակիչ մրցույթի (մայիսի 12) և եզրափակիչ մրցույթի (մայիսի 16) համար: Քվեարկությունը կատարվում է ուղիղ եթերով հաղորդավարի ազդանշանից հետո:
Քվեարկել նախընտրած կատարողի օգտին հնարավոր է ինչպես ֆիքսված կապի, այնպես էլ բջջային ցանցերի բոլոր հեռախոսահամարներից:
Սեփական ձայնը նախըտրած կատարողի օգտին տալու համար պետք է զանգահարել համապատասխան համարին` 0 9009 90XX, որտեղ վերջին երկու թիվը մասնակից երկրի համարն է` 01-ից մինչև 18-ը (առաջին կիսաեզրափակիչ), 01-ից մինչև 25-ը (եզրափակիչ)։
Քվեարկել կարելի է նաև նախընտրած երգի օգտին` ուղարկելով մասնակից երկրի համարը պարունակող SMS 7708 կարճ համարին։
7708 կարճ Համարին ուղարկված մեկ SMS-ի արժեքն է 260 դրամ (ներառյալ ԱԱՀ):
Հեռուստաքվեարկության կանոնների համաձայն՝ բաժանորդը չի կարող քվեարկել սեփական երկրի օգտին, մեկ հեռախոսահամարից կարելի է զանգարահել 20 անգամից ոչ ավել, 7708 կարճ համարին կարելի է ուղարկել անսահմանափակ քանակի SMS հաղորդագրություններ, սակայն քվեարկության մեջ հաշվի կառնվեն միայն առաջին 20 SMS հաղորդագրությունները` ուղարկված մեկ բաժանորդի կողմից։ Եթե բաժանորդը ուղարկի SMS հաղորդագրություն Հայաստանի կոդով (02) կամ ցանկացած տեքստով, որը չի համապատասխանում մասնակից երկիրների կոդերին կամ ցանկացած այլ ֆորմատի հաղորդագրություն, նրանք կմշակվեն, սակայն չեն հաշվարկվի որպես քվեարկված ձայն: Եթե բաժանորդն ուղարկի SMS հաղորդագրություն նախքան քվեարկության սկսելը կամ նրա ավարտից հետո, նրա հաղորդագրությունը կմշակվի, սակայն չի հաշվարկվի որպես քվեարկված ձայն:
Հեռուստաքվեարկությունը տևելու է 15 րոպե, որի սկիզբն ու ավարտը (քվեարկության ժամանակահատվածը) կհայտարարվի հաղորդավարի կողմից, ինչպես նաև կնշվի հեռուստաէկրանին:
Եվրատեսիլ 54-րդ մրցույթն անցկացվում է Մոսկվայում։ Հայաստանը մասնակցում է մրցույթին արդեն չորրորդ անգամ։ Հայաստանն այս անգամ կներկայացնեն Անուշ և Ինգա Արշակյանները: 2008 թ.-ին հայ երգչուհի Սիրուշոն զբաղեցրեց չորրորդ տեղը։
Սիրուշով գերազանցեց Հայաստանը ներկայացնող նախկին կատարողներ Անդրեին (2006) և Հայկոյին (2007), որոնք նախորդ մրցույթներին զբաղեցրել էին ութերորդ տեղը։-0-
