ՀՀ կապի և տրանսպորտի նախարար Գուրգեն Սարգսյանը հույս է հայտնել, որ ռուս-վրացական հարաբերությունները կշտկվեն, ինչի արդյունքում էլ կբացվի Վերին Լարս հսկիչ-անցագրային կետը:
«Այժմ քաղաքական որոշման հերթն է: Խնդիրը ռուս-վրացական հարաբերություններում է: Հուսամ, որ առաջիկայում Ռուսաստանի և Վրաստանի միջև հարաբերությունները կբարելավվեն և կջերմանան, ինչը ձեռնտու կլինի տարածաշրջանի բոլոր երկրներին»,- երեքշաբթի լրագրողներին ասաց Սարգսյանը:
«Հայաստանի միջազգային բեռանափոխադրողների միության» գլխավոր քարտուղար Հերբերտ Համբարձումյանն իր հերթին նշեց, որ այս խնդրի լուծումը կախված չէ Հայաստանից:
Ռուսաստանի և Վրաստանի սահմանի միջազգային ավտոմոբիլային հսկիչ անցագրային միակ կետի՝ «Վերին Լարսի» (որը 2006թ. փակվեց վերակառուցելու նպատակով) շինարարության ավարտի հանդիսավոր արարողությունը տեղի ունեցավ նախորդ երեքշաբթի: «Վերին Լարսը» տեղակայված է Վլադիկավկազից 38 կմ դեպի հարավ:
«Վերին Լարսի» թողունակությունը կկազմի օրական 400 մեքենա՝ միաժամանակ ապահովելով տրանսպորտային միջոցների համար նախատեսված 12 գծանի երթևեկություն և երկու հավելյալ գիծ պահուստային երևթևեկության համար: Հարկ է նշել, որ նախագծով նախատեսված է նաև օրական մինչև 600 ավտոմեքենա տեղավորելու հեռանակարային զարգացման հնարավորությունը»,- ՌԻԱ Նովոստիին է հայտնել Հյուսիսօսեթյան մաքսատան մամուլի քարտուղար Տամարա Ցագարաևան:-0-
