ԵՐԵՎԱՆ, 11 մայիսի. /Նովոստի-Արմենիա/. Նախագահ Սերժ Սարգսյանը ցավակցական ուղերձ է հղել ՀՀ արվեստի վաստակավոր գործիչ Հենրիկ Իգիթյանի մահվան կապակցությամբ:
«Խոր ցավով տեղեկացա Հայաստանի Հանրապետության արվեստի վաստակավոր գործիչ Հենրիկ Իգիթյանի մահվան մասին: Իգիթյանը մեր նորագույն պատմության հազվագյուտ անհատներից էր, մեր երկրի ու հայ մշակույթի երախտավորներից»,- ասվում է հայկական պետության ղեկավարի մամուլի ծառայությունից «Նովոստի-Արմենիա» գործակալությանը տրամադրված նախագահի ուղերձում:
«Իր գործունեության բոլոր ոլորտներում նա առաջամարտիկ էր, ով հաղթահարում էր անհնարին թվացող խոչընդոտներ, ճշմարտության ու գեղեցիկի համար ճանապարհ բացում` սեփական օրինակով ապացուցելով, որ իրական հայրենասերի ու արվեստագետի առաջ անանցանելի արգելքներ չկան»,- ասել է նախագահը:
Պետության ղեկավարի խոսքերով, Հենրիկ Իգիթյանը կարծում էր, որ մտավորականը պետք է մտածելակերպով ու գործով միշտ բոլորից քայլ առաջ լինի:
«Նա այդպիսին էր թե հասարակական-քաղաքական կյանքում, թե արվեստում: Ժամանակակից արվեստի իգիթյանական թանգարանը նոր շունչ հաղորդեց մեր կերպարվեստի զարգացմանը, իսկ մանկական արվեստի գեղագիտական դաստիարակության կենտրոնն իր տեսակի մեջ եզակիներից է աշխարհում: Մշակույթի այդ օջախներն այսօր էլ քարոզում են արվեստ` առանց պայմանականությունների»,- ընդգծել է նախագահը:
Նրա խոսքերով, Հենրիկ Իգիթյանի համար արվեստը, հայ մշակույթի հարատևությունը հավատամք էին:
Սարգսյանը նշել է, որ Իգիթյանը սիրում ու գնահատում էր մեր մշակույթը և պատգամում. «Մտե՛ք ժամանակակից արվեստի թանգարան, տեսե՛ք մեր մշակույթը, որն ուրիշներին չի զիջում»:
«Կորստի այս ծանր պահին խորին ցավակցություն եմ հայտնում անվանի արվեստագետի ընտանիքին և հարազատներին, նրա գործընկերներին ու սաներին»,- ասվում է ուղերձում:-0-
