Հայաստանն ամենակարևոր աշխարհաքաղաքական օղակն է դառնում Եվրամիության և ԱՄՆ-ի համար Հարվային Կովկասում, կարծում է ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը։
«Ռուս-վրացական պատերազմից հետո տարածաշրջանում բարձրացել է Հայաստանի աշխարհաքաղաքական դերը»,- երկուշաբթի մամուլի ասուլիսի ժամանակ ասաց Սաֆրաստյանը։
Ըստ նրա, դա պայմանավորված է այն հանգամանքով, որ Ռուսաստանը՝ որպես Հայաստանի ռազմավարական դաշնակից, պահպանել է իր դիրքերը և խորացրել իր համագործակցությունը ՀԱՊԿ շրջանակներում։
Բացի այդ, Սաֆրաստյանը նշեց, որ Հայաստանը օգոստոսյան պատերազմից հետո կարող է կառուցողական կապեր պահպանել Վրաստանի հետ, ինչպես նաև ամրապնդել կապերը դաշնակիցների հետ Եվրոպայում։
«Կարծում եմ, որ Հայաստանը Եվրամիության և ԱՄՆ-ի համար դառնում է աշխարհաքաղաքական ամենակարևոր օղակը Հարավային Կովկասում»,- նշեց Սաֆրաստյանը։
Ըստ նրա, տարածաշրջանում Հայաստանի դերի բարձրացումը հանգեցրեց նրան, որ Թուրքիան գնաց երկկողմ հարաբերությունների բարելավման «ճանապարհային քարտեզի» հաստատմանը։
Սաֆրաստյանը նշեց, որ նմանատիպ իրադարձությունները դրդում են ԱՄՆ-ին և Թուրքիային նորովի համագործակցել Հայաստանի հետ։
Մյուս կողմից, փորձագետի խոսքերով, ԵՄ «Արևելյան գործընկերության» նոր նախաձեռնությունը կարևոր է Հայաստանի համար, քանի որ հնարավորություն է ընձեռում աջակցություն ստանալ ԵՄ-ից «ավելի արագ եվրաինտեգրման առումով»։
«Որքանով կկարողանանք օգտվել այդ հնարավորությունից, կախված է մեզանից»,- ասաց Սաֆրաստյանը:
Նա համոզմունք հայտնեց, որ առաջիկա տարիներին Հայաստանն իրական հնարավորություն ունի ինտեգրվելու եվրոպական միությունում, բայց դրա համար պետք է աշխատել ինչպես պետական շրջանակներում, այնպես էլ հասարակական կազմակերպություններում։
Միաժամանակ Սարֆրաստյանը կարծում է, որ ԵՄ քաղաքականությունն ուղղված է եվրոպական ազդեցության տարածմանը Ռուսաստանի ազդեցության տակ գտնվող երկրների նկատմամբ։
ԵՄ «Արևելյան գործընկերություն» ծրագիրն ընդունվել է Լեհաստանի և Շվեդիայի նախաձեռնությամբ և հաստատվել է ԵՄ 27 երկրների կողմից 2008 թ.-ի դեկտեմբերին Բրյուսելում կայացած գագաթնաժողովի ժամանակ։ «Արևելյան գործընկերություն» փաթեթը նախատեսում է Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի հետ ԵՄ համագործակցության զարգացում, քաղաքական ինտեգրման աստիճանի առավել զգալի բարձրացում։
Ծրագրի շրջանակներում ԵՄ-ն այդ երկրներին 600 մլն եվրո կհատկացնի 2009-2013 թթ.-ին։ -0-
